Shillong, Nailur 19 : U Myntri ka tnad Pule Puthi ka sorkar jylla, Rakkam A Sangma ha ka sngi Ba-ar u la ong ba la bthah ïa u District School Education Officer (DSEO), Ri Bhoi ban leit jurip khah khah ïa ka JNV School Niangbari ban pyntikna ba ka jingïoh pang ki khynah kan ym jia shuh.
“Ka tnad pule puthi ka la shimkhia halor katei ka mat bad la bthah ruh ïa u DSEO Ri Bhoi ban leit jurip khah khah ïa katei ka skul bad ban pyntikna ba kum kitei ki jingjia kin ym jia shuh,” ong u Myntri haba jubab halor ka Call Attenion ba wanrah da u MLA ka UDP na Nongpoh, Bah Mayralborn Syiem ha Iing Dorbar.
Ha kajuh ka por u la pynshai pt ba ka jingujor da ki khynnah ba sah ha katei ka jaka pule kam don jingïadei ei ei bad ka PM Poshan (midday meal) jong ka sorkar jylla.
La ïathuh ruh ba ka tnad hadien ba ka la ïohi ïa ki video ha ki lad pathai khubor ha ka 26tarik Naitung ba ki khynnah skul ki kem pang mar mar ha ka 27tarik, u Deputy Commissioner u la bthah ïa u Food Safety Officer Ri Bhoi bad ka report ba phah da u FSO ryngkat ki magistrate ban lum ïa ki nongmuna jong ka um bad ka bam ban test bad pynlong ruh ka jingtohkit halor kane ka jingjia.
La ïathuh ruh ba ïa kitei ki nongmuna la phah ban test sha ka state food testing laboratory, Pasteur Hills, jong ka sorkar jylla ha katei hi kajuh ka sngi. Shuh shuh la ong ruh ba ha ka 02tarik pat u Food Safety Officer u la phah biang ïa ka kynhun ban leit jurip kynsan ïa ka rukom ai bam kaba ai sha ki khynnah jong katei ka skul bad shim nongmuna bad phah test biang sha Mitra SK Private Limited, Building P-48, Udayan Industrial Estate, 3 PAgladanga Road, Kolkata West Bengal.
La ong ruh ba katkum ki kaiphod, u Deputy Commissioner u la pynmih ka jingbthah kaba pyrkhing ïa Principal jong ka JNV Niangari ban pyntikna ba tang ki bam kiba khuid bad kiba thymmai dei ban ai sha ki khynnah.
