7 sngi ai por ka National Commission for Women ïa u CS halor ka jingjia ha Pamphyrnai

Shillong, Nailur 19 : Ka Chairperson jong ka National Commission for Women (NCW) ka Rekha Sharma ka la ai por shi taiew (7sngi) ïa u Chief Secretary ka Jylla, Bah DP Wahlang ban phah ïa ka kaiphod sha ka Commission halor ka sienjam ba ka sorkar ka shim haba ïadei bad ka jingjia dang shen ha Pamphyrnai, West Khasi Hills.
“Nga kyntu ba phin shimkhia ïa kane ka kam bad ai ki jingïarap bad ki jingkyrshan kiba donkam ïa ka kmie jong ine i khunlung iba khlad,” ong ka shithi ba la phah da ka Commission sha u Chief Secretary.
Ka Commission ha ka shithi sha u CS ka la ong ruh ba ïa katei ka jingjia ka la ïohi lyngba ki lad patha khubor ba kane ka longkmie namar ka jingsahkut kali ba don ka jingkhwai dohkha ka la kha noh lynti hynrei itei i khunlung i la khlad noh. La ong ruh ba na ka liang ki bahaiing ha sem ki la hap ban pynkit noh ïa katei ka longkmie sha Mairang ban ïoh ïa ka jingsumar.
Lah ban kdew hangne ba katei ka la jia ha kane ka sngi Saitjain ha kaba ka kali ba kit ïa katei ka longkmie ka la sahkut noh ha lynti na ka jingbun ki nongwan khwai dohkha ha Pamphyrnai, West Khasi Hills.