Shillong, Naiwieng, 16: Ka Sorkar Assam bad Meghalaya haduh mynta kim pat aiti satia ïa ka jingtohkit sha ka Central Bureau of Investigation (CBI) halor ka jingjia ha ka 22 tarik, Naiwieng, 2022 ha ka shnong Mukroh, West Jaiñtia Hills District.
U Myntri Rangbah ka Jylla Conrad K. Sangma ha ka sngi Palei u la ong, ‘ban pyntreikam ïa kane ka rai, donkam ban ïaid da ka lynti kaba baroh ar tylli ki jylla ki donkam ban ïasoi ïa ka rai kaba la shim ha ka jingïalang jong ki Myntri Rangbah kaba la long ha ka 30 tarik, Nailur 2023.”
“Namarkata, ka kam ka kham shimpor namarba ki ktien, wat tang uwei u Coma u lah ban pynkylla ïa ka jingmut jong ka rai bad yn hap ban leh bha thik pa thik,” u la ong bad bynrap, “ïa kata la leh mynta. Baroh arngut ki Myntri Rangbah kin hap ban soi ïa ka rai ba la shim ha ka jingïalang.”
“Mynta ka jingïakren (ka rai ban aiti ïa ka jingtohkit sha ka CBI) sha ki commission bapher bapher bad ka Sorkar India yn sa shim noh shen,” la bynrap u Sangma.
U Myntri Rangbah u la ong ba ka jingïalang ka la rai ban weng noh ïa ki bor pahara na ki bynta bapher bapher.
“Ki don ruh kiwei ki daw ha kaba ngin sa ïohi ba ka jingweng noh ïa ki bor pahara da ka Sorkar Jylla ha ki bynta bapher bapher. Nga kwah ban ong ngam da kwah ban batai bniah than khamtam ha ki jaka kiba kham mih ki jingïakynad, ha kaba ngin sa ïohi biang sa shisien ba ki jingïakynad kin sa hiar arsut,” u la bynrap.
Shuh shuh, u Sangma u la ïathuh ba u la ïai kren bad u Himanta Biswa Sarma ban shim rai halor ka jingleit sorjamin ïa ka Block I bad ka thaiñ Khanduli-Psiar, hynrei ka jingpynslem ka dei na ka daw ka jingdon jong ki katto katne ki elekshon.
“Ynda ki elekshon ki la kut, ngi khmihlynti ba ngin sa leit sorjamin ïa ka thaiñ Khanduli-Psiar bad ka Block I ha ka jaka ban sa pynbeit hynrei haduh mynta hi ngim pat ïapynbeit ïa ka jaka,” u la ong.
Ha kawei pat ka liang, u Myntri Rangbah u la ïathuh ba ki Regional Committee ki la sdang ban pyndep ïa ki kaiphod sorjamin ha kaba kin sa aiti shwa ka 31 tarik, Nohprah.
“Hadien ka jingïakren bad ki Committe, nangta ngin sa shim rai kumno ban ïaid shakhmat,” u la ong.
