Hadien 2 snem ba la thung, yn pyntreikam noh ïa ka Council ki Khasi Jaiñtia ba sah ha Assam
Shillong, Naiwieng 16: Hadien 12 snem ka jingdawa bad ka 2 snem ba la thung ïa ka, ka Khasi Jaiñtia Development Council (KJDC) kan treikam noh.
Kane ka long katkum ka rai jong ka Kynhun Myntri jong ka Assam ba la pynbna da u Myntri Rangbah, u Himanta Biswa Sarma. Kane ka rai kan wanrah ka jingkmen kaba khraw ïa ki shi lak ngut eiei ki paid Khasi Jaiñtia kiba la shong ba sah ha Assam khambun ha Barak Valley, Cachar bad Upper Assam.
Lah ban kdew hangne ka jingdawa ban don noh ka Khasi Jaiñtia Development Council kadei kaba la sdang naduh ka snem 2011. Ka sorkar ka la rai ban thung ïa kane ka Council ha u snem 2021, hynrei ka la shu sahkut kumto khlem treikam ha kine ki arsnem, tad haduh ka rai jong ka Cabinet mynta ka sngi.
Haba la ïoh ban ïakren bad u Bah Sebastian Pakynteiñ, uba long u Chairman jong kane ka Council, u la pynpaw ka jingsngewkmen kaba khraw ïa kane ka rai jong ka Kynhun Myntri ka sorkar bad ai khublei kyrpang ïa u Myntri Rangbah, u Himanta uba la sngap bad shah shkor ïa ka jingdawa jong ki paid Khasi Jaiñtia ha Assam.
Haba batai ïa ka jingtreikam kane ka Council, u Bah Sebastian, u la ïathuh ba lyngba kane ka Council, ki kam pynroi bad ka ïoh ka kot ki Khasi Jaiñtia yn pyntreikam noh lyngba kane ka Council da ka jingbei pisa ka sorkar Assam. “Ka jingpyntreikam ïa kane ka Council ka mut ka sorkar ka la ithuh ïa ngi ki Khasi Jaiñtia ba ngin don la ka jong ka rai na ka bynta ka roi ka par”, la ong u Chairman ka Council.
U la ïathuh ruh ba kiba kum kine ki Council ki don bun ha Assam ba ka bynta kiwei kiwei ki jaidbynriew, tangba ki ïapher na ki District Council ne ki Autonomous Council, namar ba kim don ki ïingdorbar Thawaiñ ne kim lah ban don ki nongmihkhmat la ki jong sha Assembly.
Hynrei u la ong ba kan ailad ïa ki paid Khasi Jaiñtia ba kin peit hi bad pyntreikam hi ïa ki kam kiba ïadei bad ka roi ka par ha kiba bun ki liang na ka bynta ki Khasi Jaiñtia kiba sah ha Assam.
“Ngi kyrmen ba kane kan long ka jingkyrkhu kaba khraw ïa ki paid Khasi Jaiñtia kiba la shong la sah da ki spah snem ha Assam.
Na ka liang ka KSU Barak Valley ruh ka la pynpaw ka jingsngewkmen ïa kane ka rai jong ka Sorkar ha kaba la ong ba kan pynurlong ïa ka jingangnud kaba la slem jong ki paid Khasi Pnat ha Assam.