Ngi hap ïadom bad ki menkpa ba ngi hap kit bun ki rejistar sha ïing

Mairang, Naiwieng 16: Ka Seng jong ki ASHA ka la pynpaw ka jingsngewsih kaba jur ïa ka jingthad madan ka Myntri ka tnad ka koit ka khiah, ka Kong Ampareen Lyngdoh halor ka jingïoh ki ASHA, kaba dei pynban ka jingïoh naduh u snem 2013 haduh 2018, ha ka por ba long Myntri ka koit ka khiah u Bah AL Hek.
Ka Kong Sonny Kharjana, Adviser jong ka Meghalaya ASHA Workers Union, haba kren ha ka jingïalang ki ASHA ha Mairang hadien ka jingmih paidbah ki ASHA ha Eastern West Khasi Hills District, ka la ong ba kane ka jingleh ka Kong Ampareen, kadei ka jingthad madan ïa ka bym shisha bad lynti kaba bakla. “Lada phi la thad madan, ngi ruh ngin sdang ka jingthad madan. Lada ka kmie ka ïaid ha la lynti bym dei, ki khun ruh kin ïaid ha ka lynti bym dei”, la ong ka Kong Sonny.
Shuh shuh, ka la ong ba ka jingong ba ka Myntri ka koit ka khiah ba ki ASHA ki ïoh bun ki jingsiew ne ki incentive, ka nongai buit ki ASHA, ka la ong ba ka Myntri kadei ban tip ba kiba bun na kine ki jingsiew ki ASHA kim ïoh ktah satia. “Ka Myntri kadei ban tip ba ki ASHA kim ju ïoh jingsiew lada ki longkmie ki leit kha khunlung ha ki Private Hospital, hynrei ki ïoh tang lada ki longkmie ki leit kha ha ki Hospital sorkar”, ka la ong.
Ka Kong Sonny ka la ther tyngeh ruh ïa ka jingleh ka sorkar, ka bym pynbiang ïa ki jaka sumar, khamtam lei lei ïa ki jaka kha khunlung. Ka la ong ba kumno ki longkmie kin leit kha khun ha ki Hospital sorkar haba ki kamra kim biang, ka jingsumar kam biang?. Ka la ai ka nuksa ïa ka Ganesh Das Hospital, ha kaba ym ju shah ïa u kurim uba leit on ïa ka menkmie ban leit kha ba un shong ne ap ha kamra, hynrei u hap ap shabar tang ka jingtap ne jingker ruh ym don. “Mano ba ap ha kata ka por, hato ym dei ki ASHA. Ka kamram ki ASHA kadei tang ban leit on ha Hospital, hynrei ha ki khep ka hap ap lang ha Hospital. Mano ban siew haba kumta ïa ka bai sngi jong ka?”, la ong ka Kong Sonny.
Shuh shuh ka la ong ba ki ASHA ki hap ban pyndep bunbah ki kam, khamtam eh ha kaba pynbiang ïa ki record ha ki rejistar bad haba pynbiang ïa ki report ruh ka tnad ka koit ka khiah kam ju ai por ka dawa beit ban pynbiang kyrkieh. “Namarkata ka daw bun ki ASHA bapli ki hap ïadom bad ki men kpa, namar ba hap ban pynbiang ïa ki rejistar bad hap ban ieh ïa ki kam ïing”, la ong ki nongïalam jong ki ASHA.
Ha shuwa jong kane la ïoh ïa ka jingkren na ki kkato katne ki Sordar Shnong jong ka Eastern West Khasi, ki nongïalam Sengbhalang kiba la wan ban ai jingkyrshan ïa kane ka jingïakhih ki ASHA.
Ka jingïakhih ki ASHA ha Eastern West Khasi ka la sdang da ka Peace Rally na Civil Hospital Mairang bad pynlong ka jingîaid kjat lyngba ka Pyndemumïong haduh Mot Tirot ban pynlong ïa ka jingïalang.
Ki Placard kiba la rah da ki ASHA ki don ki jingthoh kiba ong, “66 tyngka bai nong jong ngi”- “Ka kam shi khoh- jingsiew pat shi troh”. “Ka kam shikit- jingsiew pat iba rit”.