Kato ka North East United FC kaba jop ïa ka Lajong ha madan Polo, ka ksaw phylla kumno-re, haba ka la rah syndon ïa ka nam jop, da kaba pynliem kat ïa ka Mohun Bagan ha ka Final ha ka sngi Saitjaiñ, 31 August ha Calcutta.
Ka Mohun Bagan ka la tam lypa 2 goal ha ka kylla step, hynrei ka NE United ka pynïakhaid ha ka kylla miet.
Ha ka jingïashut penalty pat, ka trei ka NE United ïa ka Mohun Bagan, namar u goalie ka NE United ula ïada 2 tylli ki bol ba kin ym rung shapoh.
Ha bym jop pat te, ka dei sa tang ba ïakhaid (draw) lane haba rem hi kein, kumba la long ka Shillong Lajong kaba la ïaleh pyrshah ïa ka North East United ha Madan Polo ha ka Sngi u Blei 26.08.24, ha kaba ka la shah thep haduh 3-0, haduh ba ka da ktah ïa ki nong kyrshan kiba la tuid da ki hajar sha madan Polo bad da ki phew hajar pat sha kylleng ki shnong ki thaw, ban ïa peit ha ki Pyrda Heh (Giant Screen), bym ïoh tiket shuh, namar la ïaid iew hana kita ki tiket ‘Black’ ruh.
Ka jingkhmih lynti ki babun hi ka long, ban rah beit ïa ka Cup, haba la lah ban pynjem khnap kat ïa ka East Bengal (Calcutta) ha ka Semi Final. Phewse ka la pynjew slew pynban ïa ki nongkyrshan bad ïa ki paidbah, haduh ba, bun kim bang-ja bang-doh shuh, katba kiba ju mad te hana ki la mad tam, ba ka la ktah palat.
Ka football hi ka syriem ïa ki jingïalehkai Boxing, ïalympat Wrestling, Taekwondo bad kum kine kiba ïatyngkhuh mar-met para briew (body contact). Ka long kaba donkam, namarkata, ba ki nongïalehkai kin long kiba biang ka rynnieng bad ka met ka phad de.
Ym lah ban len, ba kawei na ki daw ruh ba ka Lajong ka la rem ha shnong lajong bad hakmat ki nongkyrshan lajong suda, ka dei ka jingrit briew ki nongïalehkai, haba ïakynduh ïa ka kynhun pyrshah kaba don da ki nongïalehkai kiba kham heh met bad jrong rynnieng, nalor kiwei-kiwei ki daw de.
Hynrei kumno ka Lajong ka la jop pat ïa ka East Bengal ha ka Semi Final, ka team Calcutta ba hakhmat, kaba don da ki nongïalehkai bajrong suda? Niuma, kata ruh ka dei ka jingshisha, hynrei ym lah ban shu kyntait ïa ki mat ba kdew haneng, nalor kiwei-kiwei ki daw de, kiba dei ki bynta jong ka jingïalehkai, kaba hap shu pynkut da kaba ong, ka la long kumta ïa ka tei ka team Mohun Bagan ruh, bad khlem artatien ka jingktah ïa ka bapli ka Mohun Bagan kabym long shuh ban ïakren. “yn leh kumno bym thaw jop”, kumba ju long ka rukom.
Ki por ba la leit
Malu-mala nga kynmaw ïa ki katto-katne ki nongïalehkai jong ki snem 60 khlieh ter-ter, kiba, nga la ïohi luk-liak, kum ki jong i Bah Shering Kurbah, Bishar Thangkhiew, Patrick Syiemiong, Bah Handle Majaw, ngam pat ju ïohi ïa kita kiba kham jrong kum ita i Bah Tonel, Bah Justice, bad bun kiwei jong kitei ki por. Nga khlem ïohi ruh ïa uta u Shlur Nongbri, uba la pawnam tam napdeng ki Khasi bad uba la don hana ha kata ka list jong ka team India ruh ban ïaleh Olympic.
Ban shu kdew tang katto-katne, nga la ïohi pat ïa i Bah Bishar Thangkhiew, iba ju ïaleh na ka team Lummawbah ha kitei ki snem, i Bah Patrick Syiemiong na ka team Laban, baroh arngut ki kham duna ka rynnieng, hynrei ki tylli met ruh bad ki da tbit bha kum ki nongïalehkai; ki ju shah jied ruh na ka team Shillong haba leit ïalehkai shabar.
Haba ïanujor lei sa ïa ki madan ïalehkai jong kitei ki phew snem ba la leit, yn pynïadei shuh shano bad ki madan jong kane ka juk, kiba siang da u phlang kyrpang (artificial turf), ha kaba ki madan kim don jingat-jingthem shuh kumba long ki madan ka mei mariang hyndai. Nalorkata, ki nongïalehkai myndai ki pyndonkam da ka sap lajong, mynta pat ka la ïaid lang sa da ki jinghikai (coaching), ha ka dur ki ‘Music Notes’ jong ki nongrwai.
Kaba hap ban ïa bishar bha shuh-shuh ka long ruh, ba ki nongïalehkai jong ki juk ba la leit, kim ïoh ïa ki jingsiew kumba ïoh mynta. Lada mynsaw, sumar hi bad lut hi na lade, ka shu tyllun ha ka khem bad ka sop dawai kynbat, ym kumba long mynta.
Hynrei nga shem ba kaba kongsan tam jong ka mynnor ka long, ba ki nongïalehkai ki aiti lut ïa ka por ka bor bad ka mynsiem, kaba la ïapher bak-lybak bad kane ka juk, kaba don artad bad ‘ki jingkhein’ ïoh jingmyntoi. Niuma, kane ka la ïaid ryntih hi kumta ha kane ka juk, tangba ki dei ban don pat nalade ïa ka mynsiem aiti lut, haba la mih ha lympung, da kaba klet lut ïa kane-katai ka bym biang, hynrei thik ïa ka ‘Thong’ jingkit khlieh, ban poi sha ka jop.
Ka Subroto Cup
Hapdeng ki jingjew mynsiem ïa ka Durand Cup, pynkmen noh pat de ka jingjop ka Nongjri Presbyterian School, Umsning da 3 goal ïa ka Major Dhynanchand, Etawah, UP, ha ka kynhun hapoh 14 snem ka ryta.
Ha ka Subroto Cup, ki don ar kynhun ki skul kiba shim bynta, kawei kaba hapoh ka ryta 17 snem, kawei pat hapoh 14 snem.
Kaba la jop nyngkong eh ha ka Subruto Cup ka dei ka St. Antony’s High School, ha ka kynhun 17 snem, da shi goal pyrshah ïa ka Madhynamgram High School, West Bengal. Nangta ha u snem 1999, jop sa ka Govt. Boys High School Shillong ïa ka S.V. School na Calcutta, West Bengal, ha ka Tie Breaker da 6-5.
Nangta sa ka O.M.Roy Memorial High School ka la jop ïa ka Magurmari High School Kokrajhar Assam ha u snem 2013, da 4 goal la 0.
Sa ka H.Elias High School ka la jop ha u snem 2019, ïa ka skul KSP Dhaka kaba na Bangladesh (1-0).
Ha ka kynhun hapoh 14 snem pat, ka John Bosco Boys School Sohra, ka la jop ïa ka St. Ignatius High School, Gumla na Jharkhand (1-0), ha u snem 2001.
Ha u snem 2005 pat, jop sa ka Army Public School Shillong ïa ka Nobel Academy Hr. Sec. School Kathmandu, Nepal da 5-3 goal ha ka Tie-breaker.
Bad ha kane ka kynhun hi, la jop pat ka Nongjri kumba la kdew hakhmat.
(NB): U nongthoh u dei u footballer ka Malki SC ha ki snem ’70 khieh. U la long ruh u Best Athlete ka Shillong College, uba la tam tang 2 point ïa u Ihoto Sema uba na Nagaland, ha mar 4 tylli ki item ba ki la ban shim bynta ha madan Polo-1968; ha kaba la ïarap pynïaid ruh da i Bah Micky Lyngdoh (Football Coach) bad i Bah T. Kharkongngor, baroh arngut kiba dang ïadon mynta, hadien ba ki la shongthait.
