Mairang, Nailur 05: Ka Blossom Cluster Level Federation, Pyndengumïong Womens Cooperative Society, kaba dei ka kynhun ïatreilang ne ka Kmie jong ki Self Help Group (SHG) bad Village Organisation (VO) ha Pyndengumïong bad Mairangbah, ka la pynlong ïa ka jingïalang kaba ar jong ka hapdeng ka jinglehkmen kaba iphuh iphieng ha St. Thomas Higher Secondary School, Mairang.
Namar ka jingtrei ba radbah jong kane ka Kynhun ban kyntiew ïa ki longkmie bad ïa ka imlang sahlang ha kine ki arsnem, na ka liang ka Meghalaya Rural Bank, Mairang Branch, ka la ithuh ïa kane ka CLF ban long kum ka Kiosk Banking lane ka Bank rit ha kaba ki briew ki la lah ban thep ne sei pisa ne shim ram ruh, ha kaba la plie da u MP ka Shillong, u Dr. Ricky AJ Syngkon, uba long u Kongsan ha kane ka jingïalang.
Ha shuwa jong kane ka kane ka Kynhun ka la pynlong ïa ka jingïalang ha ka por mynstep ban pynsngew ïa ki report treikam jong ka Federation bad kumjuh ruh ïa ki jingtreikam nangne shakhmat bad kumjuh ruh ka jingïaphylliew jingmut kumno ban nang pynbha shuh shuh ïa ka jingtreikam jong ka Federation.
Ha ka jingïalang ha ka sien shon kaba ar ne ka 2nd Session, la sdang da ka jingrwai Anthem ka Federation bad la sam ruh ïa ki lad jingïarap na ka bynta ki briew kiba don jingduna ki dkhot mer bad kumjuh ruh ïa ki dkhot jong ki SHG bad VO kiba don hapdeng ka jingpang jingshitom kaba la ban slem bha ïa ki.
La pynphuh pynphieng ïa kane ka sngi da ki jingshad da ki VO kiba hap ha kane ka Federation.
U Dr. Ricky haba kren ha kane ka jingïalang, u la ong ba ka jingtrei jong ki longkmie ha kane ka jylla ka long kaba donkam haduh katta katta ha kaba palat 40% na ki longïing ha kane ka jylla kidei kiba la long khlieh da ka Kynthei ne ka Longkmie. Nangta u la ong ruh ba ka Meghalaya kadei ka jylla kaba wan ha ki bynta kiba kham shakhmat ha ka jingïap ki longkmie ha ka por ba kha khunlung bad kumjuh ruh kaba wan shakhmat ha ka jingïap ki Khunlung ha ka por ba dang kha.
“Ngi donkam shisha ïa ka jingtrei jong phi bad khamtam eh ka jingïatreilang jong phi na ka bynta ki longkmie jong ngi la ka long ka ïoh ka kot, ka pule puthi ne ka koit ka khiah ruh”, la ong u MP.
Ula ai jingïaroh ïa ki nongseng ïa kane ka Cluster Level Federation, kiba don ka jingïohi jngai na ka bynta ka lawei jong ka pateng ban dang wan, namar ha kine ki sngi ban treikam khlem da ïohi lypa ïa ka laiphew ne ka sawphew snem ban wan kan long kaba eh haduh katta katta bad ka long ruh ka lawei ka badum na ka bynta ki khun ki kti lashai la shisngi.
Da kaba ai jingïaroh ïa baroh ki VO bad ki SHG khamtam eh ïa ki longkmie kiba hap ha kane ka CLF, u Dr. Ricky, u la kyntu ruh ïa ki ba kin ïatrei da ka mynsiem ka jingïaieit, ka jingïashaniah, ka jingïaishah khnang ban lah ban poi sha ka thong kaba ki la thmu.
Ha kane ka sngi la ïoh ruh ïa ka jingkren na u Bah Ronald Kynta, Chief Operating Officer, MSRLS, Shillong, Bah Lastborn Myrthong, EAC Eastern West Khasi Hills District bad u Bah I. War, Sordar ka Shnong Mairang bah.
