Jam ka Jamshedpur FC sha ka semi final hadien ba pynliem ïa ka NorthEast United

Shillong, Lber 30: Ka Jamshedpur FC ka la pynliem noh ïa ka NorthEast United FC da 2-0 kol ha ka jingïakhun ïa ka playoff (knock out) kaba ar ha Jawaharlal Nehru Stadium kaba ha Shillong, ha ka jan miet jong ka sngi U Blei, ban jam sha ka semi-final jong ka Indian Super League (ISL) 2024-25.
Ka Red Miners (Jamshedpur) kan ïakynduh pyrshah ïa ka Mohun Bagan Super Giant kaba jop ïa ka League Shield ha ka semi final, katba ka jingïaid lynti jong ka NorthEast United ha kane ka lympung ka la poi sha kaba kut hadien kane ka namrem. Na ka liang jong ka Jamshedpur FC ka la lah ban jop san sien mynta ka samoi bad ka long ka jingïaid lynti kaba bha tam ïa kane ka klob ha ka ISL haba nujor ïa ki samoi ba ladep.
Ka Jamshedpurm, kaba ïakhun shabar nala ïing, ka la shem ïa ka kol kaba nyngkong ha ka rukom kaba itynnat, ha kaba u Ashutosh Mehta u la lah ban pashat kham jngai ïa ka bol na ka throw-in kaba la wanpoi ha u Stephen Eze hapoh ka phyllaw kol. Une u rangïalehkai ba jrong ka rynïeng u la pynbeit stet ïa ki kjat shuwa ban shut ïa ka bol kaba la rung jlang shapoh kol ha ka 29 minit.
Watla ka NEUFC ka la ïakhun tyngeh ban pynphai ïa katei ka shi kol, ha kaba ki la don ruh katto katne ki kabu ksiar hynrei kim shym la lah satia ban pynrulong kumba ki thmu, kaba la pynlong ïa katei ka kynhun ba ïakhun shabar ban lamkhmat da 1 kol ha ba kut jong ka kylla step.
Ka Jamshedpur FC ka la mad ïa ka jingeh hadien ba u Mobashir Rahman u la shah beh noh ha ka minit kaba 88 namar ka jingleh thurmur kaba la ïohi ba u la kum kyrdem ïa u wei u rangïalehkai ka NEUFC. Hynrei khatduh ka Jamshedpur FC ka la pynthikna ïa ka jingkyrmen ban khur ïa ka jingjop da kaba pynjlan ar shah ïa ka kol lamkhmat da kaba pynkhih sa ïa ka kol kaba ar ha ki minit pynjlan jong ka por, bad kane ka kol la thep da u Javi Hernandez (90+9’minit).
ïa ka nam Key Performer of the Match la khur da u Stephen Eze (Jamshedpur FC) hadien ka jinglah jong u ban ïalehkai bha kum u rangïalehkai ba shadien, da kaba lah ban khanglad bad ban pynkiar ïa kiba bun tylli ki jingpyrshang thep kol jong ka liang pyrshah (NEUFC), bad hadien ba u la pynkhih ïa ka kol kaba nyngkong bad kaba kongsan tam jong kane ka jingïakhun.
Kumta da kane ka namjop ka Jamshedpur FC kan aireng pyrshah ïa ka Mohun Bagan Super Giant ha ka semi final ha ka 03 tarik ïaïong bad 07 tarik ïaïong, katba ka NorthEast United FC ka la khyllem noh na kane ka jingïakhun.
Ka resol ba lyngkot jong ka jingïalehkai: NorthEast United FC 0 – 2 Jamshedpur FC (Stephen Eze 29′, Javi Hernandez 90+9′).