ïuhroit ka KHADC ïa ka sur u paidbah ba pyn sahngeh ïa ka Dorbar Raid Shabong: Syiem Khyrim

Shillong, K’lyngkot 20: Hadien shisngi ba ka Executive Committee jong ka Khasi Hills Autonomous District Council (KHADC) ba ka pynsahngeh lynba ka order NO.DC.XXVII/Genl/97/2017-2023/82 ïa ka jingthmu jong ka Raid Shabong ban lum ïa ka dorbar raid ban jied ïa u Acting Sordar ka Raid Shabong na ka liang u Paiem Dr Balajied Sing Syiem u Syiem jong ka Hima Khyrim u la ong ba kane ka jingkhang jong ka KHADC ka long ka jingïuhroit ïa ka sur jong u paidbah.
Haba kren bad ki lad pathai khubor u Paiem u la ong ba na ka liang jong u kum u syiem un phah da ka jingthoh sha ka KHADC ban dawa ba dei ban pyndam ïa ka hukum jong ka halor ka jingkhang ïa ki riew rangbah ka raid kiba thmu ban lum ïa ka dorbar raid.
“Kane ka jingthmu ban thung da ki administrator ka long kajingïuhroit ïa u paidbah u ba kwah da u acting sordar hadien ba ka term jong u sordar pura ka la kut noh bad ngin pynpaw ïa kane ka jingpyrshah ïa ka jingleh ka KHADC da kaba ngin phah jingthoh sha ka.” u la ong.