Nongstoiñ, Rymphang 01: Ka United Democratic Party Nongstoiñ constituency ha ka sngi balang, ka la bteng ïa ka jingïalap elekshon sa ha ka thaiñ Umyiap ïa kaba la pynlong ha madan riewblei kaba don ha mar pdeng eh jong ka pyntha Umyiap ka pyntha rep kaba heh tam ha ka jylla.
Ha katei ka jingïalap elekshon u bah Eugneson Lyngdoh MLA jong ka UDP na ka Mawphlang constituency, u ba dei ruh u khlur ïalehkai phutbol ka jylla u ba la pawnam bha ka ka ISL u la wan ban ïadon lang ban ïalap elekshon ïa u bah Polestar Nongsiej u kyrtong ka UDP jong ka Nongstoiñ constituency.
U bah Eugeneson haba ai jingkren ha kane ka sngi u la pynshai sha ki paitbah, ba ha kane ka elekshon ka ban sa wan ki paitbah kim dei shuh ban phai khmat tang sha kita ki MLA kiba nang tang ban shna skhim. Hynrei ka por ka la dei ba ki paitbah kin jied noh da ki MLA kiba nang ban shna aiñ.
Haba ong shna aiñ kam mut ba ki nongmihkhmat kin shna ïa ki aiñ ki bym ai jngmyntoi ïa ki paitbah, hynrei ba kin shna ïa ki aiñ kiba dei ki policy ki ban kyntiew ïa ka ïoh ka kot, ka jingnang jingstad, ka koit ka khiah, ka ai kam ai jam khamtam eh ka policy na ka bynta ki samla kiba don sap ha ki kam ïalehkai sport ba bun jait.
U la ong ba wat la um ïaleh elekshon shuh hynrei u don ka jingkitkhlieh ban kyntiew bad ïarap lem ïa ki samla kiba don ka sap ha ka jingïalehkai phutbol. U la kyntu ruh ïa ki paitbah ba kin ai ka jingkyrshan ba pura ïa u bah Polestar Nongsiej u kyrtong ka UDP, namar dei tang ka UDP ka party rirewlum kaba lah ban ïalam ïa ka sorkar.
U la ong ruh ba ka party kaan jop bun tam ki candidate ha kane ka elekshon ban wan. Kumta lada ka UDP kan ïoh ban ïalam ïa ka sorkar, kam don jingeh ban ïoh Myuntri Rangbah da u Khasi la jong. Kata hi ka dei ka thong ba ki paitbah ka Ri Khasi bad Jaiñtia ka angnud ha kane ka kynti.
