Kiba ïoh laisen suloi bunsien ki ju ïaid lait ïa ki kyndon ba la buh da ka Sorkar

0

Nongstoiñ, Rymphang, 1: La jan baroh ki shnong ha West Khasi Hills ki don beit ïa ki nongshong shnong kiba don ïa ki suloi siat mrad kiba la don ïa ki laisen ba ki la ïoh na ka sorkar. Lada kheiñ antad ïa baroh ki suloi hapoh ka District ki lah ban don da ki hajar tylli.
Haba phai sha ka jingai laisen jong ka sorkar ïa ki nongshong shnong, ym lah ban len ba ha kitei ki laisen la buh ïa ki kyndon kiba biang bha ba kitei ki nongbat suloi ki dei ban bud pyrkhing bad ban ym pyndonkam bakla ne ïaid lait ïa ki kyndon ba la buh. Wat la ka sorkar ka la buh ïa ki kyndon ba biang ruh, hynrei kaba eh ka long ba jan baroh kiba don suloi kim nang satia ban pule wat lada thoh da ka ktien Khasi ruh lei lei haba thoh da ka ktien phareng kitei ki laisen ki long tang kum ka jingïada ïa ki na ka jingshah kem.
Haba phai ha ki por kiba mynshuwa eh ym lah ban len ba ki suloi ki long shisha kiba ïarap bad ïada na ki mrad khlaw kiba ju pynjot ïa ka rep ka riang jong ki nongkyn-dong. Hynrei, naduh ki snem 1985-86 shaneng, ki mrad kiba pynjot ïa ki jingthung jingtep ha ki nongkyndong ki la duna haduh katta kata. Ha kine ki snem lei lei ym ju kham ïoh sngewshuh ba ki jingthung jingtep ki shah pynjot ha ki mrad hynrei dei ka mariang.
Ha kine ki sngi ym lah ban len ba ki nongbat suloi ki la pyndonkam bakla bad ïaid lait ruh ïa baroh ki kyndon kiba la buh da ka sorkar ha ka laisen. Ka jingsdang ban duh jait jong ki mrad khlaw ha West Khasi Hills naduh ki mrad kiba heh kum ki sier, ki dngiem, ki skei, ki khiat bad ki sñiang khlaw ka dei na ka jingbun palat ki nongsiat mrad.
Nalorkata ka jingnang duh jait ki mrad kiba kham rit kum ki shrieh, ki tngaw, ki rabit, ki syiar khlaw bad kiwei kiwei, ka dei na ka jingbeh thong jong ki nongbat suloi. Lada leit ha kylleng ki jaka kiba dang kham don ki khlaw la ju lap ba ka jingbeh thong ïa ki skei ka dei ym tang ha ka por mynsngi ba ki beh da kaba pyndonkam da ki ksew beh mrad.
Hynrei, wat ha ka por mynmiet ruh ki beh thong da kaba leit ap ha ki jaka ba ki skei ki ju wan bam soh kum ïa ki soh mylleng, soh jri, soh lait bad kiwei kiwei ki jait soh. Lyngba kitei ki jait jingbeh thong ki mrad khlaw kiba heh bad barit kin ym lah shan satia.
Kumta na ka bynta ban pynneh pynsah ïa ki mrad ki mreng, ki nongsynshar shnong ki la dei ban ai ka jingïatreilang kaba jan bad ka sorkar bad ka sorkar ruh kan pynkup bor ha ki nongsynshar shnong, ba kin shna ïa ki kyndon ba pyrkhing ïa kito ki nongshong shnong kiba don suloi, ba kim dei ban siat pathar ïa ki mrad. Lada ki lap ki dei ban pyntip wut wut sha ki bor sorkar khnang ba kan leh ïa kaba donkam.

Leave A Reply

Your email address will not be published.