Ishu Casino : Byrngem ka HITO ban ïalap elekshon pyrshah ïa ka MDA

Shillong, Nohprah, 23: Ka Hynñiewtrep Integrated Territorial Organization (HITO) ha ka Sngi Thohdieng ka la ai por tang lai sngi ïa ka seng saiñpyrthei UDP, HSPDP, BJP bad ïa ka PDF ban weng noh ïa ka jingkyrshan na ka Sorkar Meghalaya Democratic Alliance (MDA) ba la ïalam da ka National Peoples Party (NPP)
Ha ka jingïakren bad ki lad pathai khubor u President ka Seng u Bah Donbok Dkhar u la ong ba kane ka jingdawa jong ka seng ïa kine ki seng saiñpyrthei ban weng noh ïa ka jingkyrshan na ka Sorkar MDA ka long halor ka nongrim ba ka Sorkar kam shym la treh ban khot pynlong ïa ka Dorbar Kyrpang lane ka Special Session jong ka Iingdorbar Thawaiñ ka Jylla ha kaba ïadei bad ka jingdawa ban pyndam noh ïa ka aiñ Khalai bad khamtam eh ha kaba pynïaid shakhmat ïa ka Casino.
Ka jingpyrshah ban pynlong aiñ ïa ka Meghalaya Regulation of Gaming Act, 2021 bad kumjuh ruh ïa ka Meghalaya Regulation of Gaming Rules, 2021 ka la jur bha na ki kynhun jong ki nongïalam Niam bad na ki Sengbhalang ha kine ki khyndiat bnai.
Ha ka 14 tarik, Risaw, 2022 ka Sorkar Jylla ka la wanrah da ka Ordinance ban pyndam ïa ka Meghalaya Regulation of Gaming Act, 2021 hadien ba ka la mih ka jingpyrshah kaba jur na ki paidbah.
U Bah Donbok Dkhar u la ong lada kine ki seng saiñpyrthei kim treh ban weng noh ïa ka jingkyrshan na ka Sorkar kan pynsuba ïa ka seng ba ma ki ruh ki ïadon bynta lang ban wanrah ïa ka aiñ khalai ha kane ka jylla Meghalaya kaba la pyrshah da ki paidbah nongshong shnong jong ka jylla baroh kawei.
“….ngi kyntu ïa phi ba phin weng shisyndon na ka MDA hapoh lai sngi naduh ba la ïoh pdiang ïa ka shithi namar ngi na ka liang ka HITO kum ka seng kaba don ka jingkitkhlieh ïa ka lawei jong ka ri bad ka jaitbynriew ngi la shim ïa ka rai ban ïalap elekshon pyrshah ïa ka Sorkar MDA namar ka jingbym suidñiew ïa ka sur jong u paidbah ban pynduh pyndam noh ïa ka aiñ khlai,” la byrngem ka seng lyngba ka shithi ba la phah sha ki President bad ki Secretary jong ka UDP, HSPDP, BJP bad ka PDF.
“Lada phim lah ban weng ïa ka jing kyrshan jong phi kan long kaei kaei kaba pynsuba ïa ngi kum ka seng ba phi ruh phi ïadon bynta lang ban wanrah ne pdiang ïa ka aiñ khalai hapoh ka jylla jong ngi bad ka pyni shai ba phim don ka jingkitkhlieh ïa ka ri bad ka jaitbynriew hynrei tang ban pynmyntoi ïa phi shimet bad ïa ka party jong phi,” la bynrap ka Seng.