Shillong, Nohprah 23: Hapdeng ka jingshah thombor ki Khristan ha ri India, ka Laban ka la pyni ïa ka jingïalong kawei, haba ki Msulim, ki Hindu bad kiwei ki jait niam,ki la rakhe lang ïa ka Khristmas ryngkat u MLA, Bah Sanbor Shullai
Kane ka jingrakhe Khristmas ka long lyngba ka jingpynlong da u Myntri ka sorkar jylla uba long ruh u MLA ka 19- South Shillong u Bah Sanbor Shullai ha ka sngi Thohdieng u la pynlong ïa ka jingrakhe khristmas da kaba ïaid karol ha kylleng ki bynta ka Laban ban ai khublei Khristmas bad snem thymmai ïa ki nongshong shnong ka constituency.
Ha kane ka jingïaid karol la wan shim bynta da ki riewngeit kiba pher ba pher kiba ym dei na ka jingngeit Khristan ban rakhe lang ïa ka sngi khraw ki riewngeit.
Haba kren ha kane ka sngi u Bah Sanbor u la ong ba ka Laban hi ka dei ka constituency kaba pyni ïa ka nuksa ban burom markylliang ïa ki jingngeit niam namar ha ka Puja ki Hindu ki Khristan bad Muslim ki ju rakhe lang, ha ka Id ki Muslim ki Khristan bad Hindu ki rakhe lang bad kumjuh ka jingrakhe Khristmas ki Khristan la shim bynta lang da ki Hindu bad Muslim ruh.
U la ong ruh ba ka jingrakhe ïa ka khristam ka dei ba wanrah ïa ki soh ka jingïarap para briew bad ban burom ïa kiwei khlem don ka jingïapynrem ïano ïano kiba don jingduna ne bakla.
Ha kane ka sngi u Bah Samnbor u la plie ruh ïa ki shyngoid bad ki khilon Khristmas.
