Haba shu sngap bad shu ïakren paidbah ym sngewlah ngeit ban ong ba ka jylla Meghalaya kan dei kawei ka ki jylla kiba duk tam hapoh jong k ari India. Hynrei ïa kane jingduk jong ka jylla Meghalaya ym lah satia ban len shuh ha kine ki sngi kiba mynta, namar ba kane ka kam ka la paw paidbah haduh ki madan madiah ruh. Hooid katno kum ki trai shnong ngi sngew sarong bad sngew hieng ban ong ba ka Jylla jong ngi ka dei kaba riewspah ha ka jingdon ïa ka mariang kaba itynnad, ki mar pohkhyndew ba har rukom bad ruh ka lyer kaba pyngngad bad ka mariang kaba haba ki briew kiba namar ki wan poi shane bunsien ki kwah ban shong sah syndon. Hynrei ngi ïohi ba kane kam long satia kumta mynta bad kane ka jingduk ka la pynsniew dur haduh katta katta ïa ka jingitynnad jong ka sor Shillong hi baroh kawei kaba long ka nongbah jong ka jylla Meghalaya.
Hooid ki don bun bah ki briew kiba riewspah hapoh ka jylla bad la sakhi ïa kata da ka jingbun jong ki ïing paki dulan, ki kali remdor bad ka rukom roi jong ka khaiï pateng. Hynrei katno ka jingisangsot ïa ki lynti ki synkieng hapoh jong ka nongbah Shillong ba la shu tap da ki ïing basa bad ki dukan jot da ki bapli ki baduk kiba shong madan bad kyndoi jakpoh. Wat hakhmat jong ki dukan heh ruh la pynlip rong lut ïa ki da ka jingdon jong ki nongshongmadan kiba ka banse ka thom ïa ka sang. Kat kum ka National Multidimensional Poverty Index (MPI). la ong ba haduh 27.79% na ki nongshong shnong ka jylla ki im ha ka jingduk bad ka Meghalaya ka wan balai ha ka jingduk tang hadien jong ka Bihar bad ka Jharkhand.
Wat hadien ba la palat ïa ka sawphew snem ba la lah ban ïoh ïa la ka jong ka jylla ba pura, hynrei ki nongshnong jong ka Jylla haduh mynta ki dang kyrthat ha kane ka jingduk. Kat kum ka jingsngewthuh jong ki paidbah la ong ba ka jylla Meghalaya kam dei eh jingshisha kaba duk, hynrei kawei na ki daw ba kongsan ka long ba ka trei ka ktah bad ka kamai kajih kaba biang ka leit lut tang sha kito kiba don ha ka bor bad kito kiba long riew madan pat ki hap ban ïaid lyngba jong kane ka jingduk bad jingkyrduh. Kane ka jingduk ka kham jur bha sha ki thaiñ nongkyndong bad kat kum ka Meghalaya State Legal Services Authority la ïathuh ba ki bynta jong ka Khasi bad Jaintia Hills District kidei kiba kham shah ktah eh ba ka jingdon jong ki nongshnong shnong kiba duk bad ki don ki bynta jong ka West Khasi Hills District kiba ka jingdon ki nongshnong kiba duk ka kham bun ban ïanujor bad kiwei pat.
Kawei na ki daw jong ka jingduk jong ki briew ha ka jylla Meghalaya ka dei na ka daw jong ka jinghiar ka pule puthi, ka koit ka khiah bad ruh ki lad kamai. Ka rukom bat khyndew bat shyiap ruh ka dei kawei na ki daw ba ym lah ban wanrah ne pyntrei ïa kiba bun ki lad pynroi. Hynrei na ka liang jong ki paidbah ngi la ju sakhi na ka por sha ka bor ba ki ju kynnoh ba ka dei ka jingjur bad ka jingjyllei palat jong ka jingbamsap jong kito kiba don ha ki bor jong ka sorkar na ka por sha ka por. La ju ïohsngew ruh man la ka san snem ba la ther shaphang kane ka kam bamsap lyngba jong ki rynsan ïalap elekshon bad kawei ka sorkar hadien kawei pat ki kular ban peit ïa kane ka jingeh jong ki paidbah bad ban rat dyngkhong ïa ka jingduk, hynrei haduh mynta ruh ngi da hap ban sakhi ba ka jylla jong ngi ka la poi syndon ha ka kyrdan balai jong ki jylla kiba duk tam ha India.
Ngi ïohi ba ha ka jingshisha na ka liang jong ka sorkar ka la ïai pyrshang na ka pro sha ka por ban peit ïa kane ka jingeh jong ka jylla lyngba ki skim pynroi bad ki skim ïarap bapher bapher. Hynrei kat kum ba ka long haduh mynta ngim pat lah satia ban laitluid na kane ka jingeh bad katno ka long shisha kaba isynei ban peit ïa la ka jong ka jylla wat la baroh baroh ngi ju ïakren sarong shaphang kata ka jingdon jong ki spah mariang naduh ki mar poh khyndew, ka mariang kaba itynnad bad ka lyer kaba pyngnad, pynban ki jaka sor jong ngi ki sah rynjaiñ kat shaba phai.
