Ai khublei kyrpang ka kynhun ki long Kmie na Jaintia ïa ki ar tylli ki Seng ka JNC bad HYC

Jowai, Jymmang 03 : Ha ka kyrwoh ba la phah da kawei ka kynhun jong ki long kmie na ri lum Jaintia kiba kam ba ki dei ki kynhun nongrep, kila pynpaw ba kim lah khlem da ai khublei kyrpang ïa ki ar tylli ki sengbhalang kiba kynthup ïa ka Jaintia National Council (JNC) bad ka Hynniewtrep Youths Council (HYC) kiba la kloi ban ïarap ban leit dawa na ki bor pynïaid jong ka Power Grid na ka bynta ki 9 ngut ki lanot kiba la shah weng kam jubor na ka Power Grid.
Kane ka kynhun jong ki long kmie ka ai ka jingkyrkhu kyrdoh ïa baroh ki nongïalam jong ka seng JNC bad HYC, kila pynpaw ia ka jingkyrkhu kyrdoh ïa kine ki ar tylli ki seng ba kin nangkiew irat shakhmat. Ki da buh ruh ka jingduwai ha U Blei ka jingsuk un long ryngkat bad kitei ki nongïalam Seng, khnang ba kin ïoh ka met ka bakoit bakhiah ba kin nang lah ban long ki riewshlur kum U Kiang Nangbah.Ha ka juh ka por ka kynhun ka pynpaw ruh ïa ka jingsngewsih kthang shikatdei eh ïa ka jingshah weng kam jong kine ki 9 ngut ki Home Guards na Power Grid kiba la trei kumba 15 snem. Kumta ki buh ka jingkyntu ïa ki bor ba dei peit ba kin sngewbha ban tukla lem halor kane ka jingshah weng kam kitei ki 9 ngut.