Shillong, Risaw 31 : Ka samla Gracy Nandi ka la ïoh rah ïa ka nam lahduh ne Thei Ba Bhabriew tam jongka Shillong ban phong ïa ka pansngiat Miss Shillong 2024 ha ka lympung ïakob thei bhabriew kaba shongshit bha kaba long ha ka janmiet sngi Palei ha Soso Tham Auditorium ïa kaba la pynbit pynbiang da ka Fashion Society Shillong (FSS).
ïa ka khusnam kaba ar ha kane ka rynsan ïakob thei bhabriew la ïoh ban khur da ka samla Mahima Sinha katba ha ka kyrdan kaba lai pat la ïoh ban khur da ka samla Loretta Laloo. Baroh lang ki la don haduh 15 ngut ki thei bhabriew kiba wan ban shim bynta.
Ka lahduh ha kane ka lympung ka ïoh ruh ban khur ïa ka song pisa kaba 1lak tyngka, katba ka samla ba wan ha ka kyrdan kaba ar ka ïoh 75 hajar tyngka bud pat sa ka khusnam kaba lai kaba long 50 hajar tyngka.
Ha kane kajuh ka sngi, la sam ruh ïa ka khusnam ‘Viewers Choice Award’ ha kaba ki paidbah ki jied da kaba vote lyngba ki rynsan social media. Kumta, ïa ka khusnam ‘Mawphor – viewers choice award’, la ïoh da ka samla Loretta Laloo. Katba ia ka khusnam ‘Shillong Times – viewers choice award’ la ioh da ka samla Angelina Jackson.
La donlang ruh ha kane ka sngi naduh u Chief Executive Member ka KHADC, Bah Pyniaid Sing Syiem, nangta u Principal Secretary ka tnad Arts & Culture ka sorkar jylla, Bah FR Kharkongor nalor kiwei kiwei.
Kane ka rynsan ïakob mynta u snem ka la long kaba shongshit bha khamtam da ka jingrisa bad kynhoi ki paidbah kiba la wan ban kyrshan ïa la ki jong ki jong ki thei bhabriew kiba wan ban ïaknieh ïa ka pansngiat Miss Shillong.
Lah ruh ba kdew hangne ba kane ka jingïakob thei bhabriew kaba pawnam tam ha ka jylla kaba la ju pynlong da ka Fashion Society Shillong ka la ïaid mynta sha ka snem kaba 41.
