Shillong, Nailar 26: U Lat ka jylla u Satya Pal Malik ha ka sngi Thohdieng u la ai khusnam “Governor’s Award For Exellence In Public Service 2022” kaba la pynlong ha Dorbar Hall jong ka iing sah jong u, ïa u Mahbubul Hoque u nongseng ka skulbah University of Science and Techonology, Meghalaya bad ka Kong Trinity Saio ka nongmaitshrah ban rep ïa u shynrai Lakadong. Kine ki arngut kiba u Lat u la ai ka khusnam ka dei namar ki dei ki nongshong shnong ka jylla kiba la kiew shaphrang ha ka kam shakri paidbah ha la ki lyngkha kaba ki trei.
Haba ai jingkren ha kane ka sngi na ka liang u Lat u la ñiewtang bad ai ka jingïaroh ïa kine ki arngut kiba lalah ban kyntiew lem shajrong ïa ka imlang sahlang da ka kam kaba ki trei.
Haba kren halor ka kam jong u Mahbubul u Lat u la ai jingïaroh khamtam eh ha ba u la lah ban seng nongrim ïa ka jaka pule kaba kynsai ym tang ha ka jylla hynrei ha ka ri hi baroh kawei. U la ai jingïaroh ruh khamtam namar ka jingphai khmat ban kyrshan lem ïa ki samla pule kiba wan na ki long iingh kiba duna ka ïoh ka kot da kaba ïarap ha ka dur ka scholarship.
Haba kren halor ka Kong Trinity Saio kaba la ïoh ruh ïa ka khusnam Padma Shri na u President ka ri, u Lat u la ong ba ka jingtrei shitom jong ka ban kyntiew ïa ka rep ïa u Shynrai lakadong ym tang ba ka pynim ja ïa ki nongrep ha kane ka shnong hynrei ka kyntiew ruh ïa ka jingrep khlem ai dawai kaba long ka jingkyrkhu ïa ka khyndew ka shyiap.
