Tura, Iaiong 11 : Ki pulit ki la ïoh ban kem ïa uwei u briew uba leh beijot la bun bun sien ïa kawei ka khynnah kaba don jingduna dkhot met na ka jaka ba u rieh tngen hapoh khlaw ha South Garo Hills.
Une u briew uba kyrteng u Polti N Marak ba 43 snem ka rta u la shah kem ha ka Sngi Thohdieng ha ki pulit ka Siju Police Station hadien ba ki la ïoh jingtip ba u rieh tngen ha i iing trep iba u shna hapoh ka khlaw Jidi Gindam. Une u briew u la sah ha kane ka khlaw la katto katne sngi naduh ba la paw pyrthei katei ka kam sniew bad runar jongu.
La kynnoh ba u byrngem byrsit beit ïa katei ka khynnah lada jia ba ka ïathuh ne phla hano hano. Kaba plie haka jingtieng ka la shu sngap bad une u la shim kabu bad ïai leh beijot ïa ka tad haduh ba kan da pun khun bad paw pyrthei ba u dei ma u uba leh beijot ïa ka. Dei haba la paw pyrthei ba u phet rieh hynrei u la ngat pat mynta ha ki kti ka aiñ bad la pynngat ïa u ha ka kyndon aiñ POCSO Act.
