Ki 2 Sorkar ki pynbeit pud tang ban rhah nam ïalade bad klet ïa ki paidbah, ong ka GSU
Tura, Iaiong 11 : Hadien ba ka la long ka jingkmen bad jingkyrmen ïa ka jingshim khia jong ka sorkar Assam bad Meghalaya ban pynbeit ïa u pud u sam, hynrei ha kaba kut ka long pynban mar kongpong namar kine ki ar sorkar ki leh klet ban ïa ki paid khappud ha kane ka jingïapynbeit pud tang namar ba ki rhah nam bad khwan myntoi ïalade palat khlem da pyrkhat pat aiu ki paid khappud kin sngew ne kin shah ktah, ong ka GSU lyngba u President jongka u Zikku Balgra N Marak.
Kane ka jingrhah nam bad khwan myntoi ki ar sorkar ka la wanrah pynban ka jingeh kaba khraw bad kane ka pynpaw ïa ka jingbym long tbit bad shemphang kine ki sorkar ban pynbeit ïa u pud u sam namar ki la shu leh klet bad khlem niew burom shuh ïa ki paid khappud bad kane ka pynpaw shai kdar ba kine ki ar sorkar kim lah ban pynbeit ïa u pud khlem da ktah ïa ki paidbah.
Wat hadien ba la ïai kyrpad bad ai jingthoh sha kine ki ar sorkar hynrei ki ïai kyntait, leh matlah bad kyllut beit ïa ki paid khappud bad kawei na kiba kum kita ki shnong ka dei ka Mallangkohna. Kane ka shnong ka dei kaba hap hapoh u pud u sam ka Meghalaya ha ka Nonglang Sirdarship, West Khasi Hills naduh ba ka jylla Meghalaya ka la ïoh ïa ka jylla ba pura hynrei ïa kane la ïeh bad pynhap noh sha ka Assam. Nalor kane dang don bun ki shnong kiba kum ka Mallangkohna ha kaba ki ar sorkar kim shym la twad jingmut na ki paidbah hynrei la shu aiti beit sha ka Assam. Kumba ka paw ka kyntien “ Pud” ka long kaba donkam tam bad kham khraw ha u Myntri Rangbah ka Meghalaya u Conrad K Sangma bad ha u Myntri Rangbah ka Assam u Himanta Biswa Sarma ban ïa ki hok jong ki briew kiba sah ha khappud. Kine ki ar party ka BJP bad NPP ki leh ïa kane tang na ka bynta ka jingmyntoi jongki khlem da ïaid da ka lynti kaba beit bad kaba pynhun ïa baroh.
Kumta ka GSU ha ka jingïalang jongka Central Executive Committee jongka kal a rai ba kan ym ailad ban leit wat tang shi tda ruh ka jaka sha ka Assam ne kan ym ailad ba ki paid Achik kin shah pynhap sha Assam. Ka seng ka kyntait mardor ïa ka soskular pynbeit pud jong ki ar jylla bad ka la rai ba kan ïakhun haduh kaba kut ban wanrah ïa ka Mallangkohna shapoh u pud u sam ka Meghalaya.