Shillong, Jylliew 21: Ka nongrwai Rap kaba pawnam ha ka ri bad ka nongthoh jingrwai ka Daiaphi Lamare, ïa kaba la tip ïa ka kum ka Reble, ka la shah pynkup burom da ka khusnam ‘Icon of the Year’ ha ka rynsan kaba nyngkong eh jong ka Hello Meghalaya Music Awards kaba la long ha SRTG Ground, Polo. Haba ai jingkren pdiang ïa katei ka khusnam, ka la kyntu ïa ki samla nongrwai ka Meghalaya ba ki dei ban jam shaphrang bad ban sam ïa ka sap ka phong ka jongki bad ka pyrthei, bad ka ong, ba ka jinglong ka tem ka put bad ka rwai ha ka jylla ka long kaba kham phylla ban ïa kaba ki mut.
ïa ka Reble la pynkup burom da u Myntri Rangbah ka Jylla u Conrad K Sangma, uba la ïaroh ïa ka kum ka “icon” na ka bynta kiba bun ngut ki samla bad kaba la pynshongshit bad pawnam syndon ha ka ri baroh kawei”.
“Nga dap da ka jingkmen ba phi la ïaroh ïa kaei kaba nga lah leh. Ka long shisha ka burom” ong ka Reble ïa u Myntri Rangbah bad ïa ki paidbah.
Haba jubab ïa ka jingkylli u Myntri Rangbah ïa ka kyrwoh na ka bynta ki samla ka jylla bad ïa ki nongtem nongrwai, ka la ong, ba ka Meghalaya mynta ka la don ïa ka rynsan bad kane ka dei kaba ym shym la don satia ha ki por ba ka dang khynnah bha.
“Mynshwa ngim don ia kaba kum kane ka jingai khusnam ne Music Award. Kane ka dei kaei kaei kaba ngam ju poi pyrkhat haba nga don ha Shillong. Ka kham long bunsien, ‘Nga donkam ban mih noh nangne khnang ba ngan lah ban leh eiei’. Hynrei mynta phi baroh phi lah ïa don ïa ka rynsan, phi don ïa kaei kaei bad phi donkam ban pyndonkam ïa kata”.
Da kaba ïatreilang bad ki nongtem bad nongrwai ha kylleng ki bynta jong ka ri India bad nabar ka ri, ka Reble ka la ong, ba ki briew kiba don ïa ka sap ka phong ha ka jylla Meghalaya ki dei ki bym shym la ïoh satia ïa ka jingithuh.
“Ka jingdon sap don phong ki briew hangne bun na phi phim don jingtip. Phi donkam ban leit shatei ban pyni bad shisien ba phi la leit shabar phin sa sngewthuh haduh katno phi long kiba tbit. Nga lah peit ïa baroh ki jingpyni sap, ki Choir, ki khynnah rit bad baroh ki long kiba biang bha, phi donkam ban ngeit ïa katei. Ngi donkam shuh shuh ïa ki briew”.
Haba ka la tip ba ka la shah khot sha ka kam rwai, ka la ong, ba kam shym la don ia kano kano ka jingartatien.
“Naduh ba nga lah sdang ha ka kam rwai, nga ju don beit ïa ka rukom sngew ba ka lah dei shisha bad ngam ju don ïa kano kano ka jingsngewpher. Naduh ba nga dang khynnah, nga lah sngewthuh shai ba kane kan sa urlong. Nga tharai ka long kaba kongsan ban don ïa katei ka jingsngew man la ka sngi”.
Haba kylli kaei kaba ki briew kiba nabar ki ju kynmaw kyndiang shaphang ka kolshor ka tem ka put ha Shillong, ka Reble kala ong, ba ka dei ka khana bad ka jingangnud kaba heh kaba wan na kane ka jaka.
“Haba phi wan na ka jaka kaba kum kane, phi donkam ban don ïa ka jingangnud kaba heh bha bad ngi don ïa ka khana ka kyrpang ban ïathuh. Ngi dei ban ïarap ïa ki briew ba kin sngewthuh, ym ban peit ha kata ka rukom “oh kim sngewthuh ïa ngi” hynrei ban peit ïa kane ka jingïapher kaba lah ban lam ïa ka sap ka phong”.
Ka la ai khublei kyrpang ïa ki nongkyrshan kiba nyngkong eh ki jongka, ka la jer ia ka kyrteng u D’mon jongka Khasi Blood bad DJ Nag kum ki nongbtin bad nonghikai kiba kongsan.
“U D’mon ula ïarap ïa kiba bun ki nongrwai kiba dang khynnah bad u Nag ula leh DJ bad nga naduh ka por ba nga dang sdang, ngi lah leh lang ïa ka NBA. Ka la long shisha ka jingïaid lynti kaba long shimet ha ka jingim. Nga la sdang na kane ka nongbah, nga kwah ruh ban ai khublei bad ai burom ïa baroh”.
Kane ka jingai khusnam, ka la paw ruh kum ka jingpyrshang ha ka sien kaba nyngkong jong ka jylla ban ai jingithuh kyrpang ha ka rynsan na ka bynta ki nongtem nongrwai ka jylla ha ki bynta ki bapher bapher ha ka rukom tem bad rwai.
