Shillong, Jylliew 21: U Myntri Rangbah ka jylla u Conrad K Sangma u la ai khublei ïa u samla Richbhalang Kharshïing u ba la pass ïa ka eksam Joint Entrance Examination (JEE) mynta u snem 2026.
Ha kaba ïadei bad kane ka jingpass bha utei u samla, na ka liang u Myntri Rangbah ka jylla u la pynpaw ïa ka jingsngewkmen ba ha ka rta kaba 17 u samla Richbhalang u la pass ïa kane ka eksam bad napdeng ki riewlum u la wan ha ka kyrdan kaba 15 ka dei ka jingjop kaba khraw.
Shuh shuh u Myntri Rangbah u da sngewkmen ban ïohi ba u la ïoh ban pule ha ka jaka pule ba paw bha ha IIT Bombay ha ka subjek Computer Science bad Engineering kaba dei kawei na ki jingpule kaba paw bha ha ka ri.
U Myntri Rangbah ka jylla u ai ka jingkhublei kaba kyrpang ïa ne u samla ba u da sngew sarong ba ka jylla ka la sei u samla ba stad, bad u la kitbok ba yn dang leh bha ha ki jingpule jong u ha ki por ki ban dang wan.
U Myntri Rangbah u la ong ba kane kan long ka burom kaba khraw ïa ka jylla naba kane ka eksam kadei kaba hap ban ïakhun da ka jingtrei shitom kumta kane ka jingpass bha u samla Richbhalang ka long ka burom kaba khraw bha ïa ka jylla bad ka jingai mynsiem ïa kiwei pat ki samla jong ka jylla kiba pynkhreh ban ïakhun ïa ki eksam bapher bapher jong ka jylla ne hapoh ka ri baroh kawei.
