ïoh ka Mawhati ïa ka C&RD, ki song pynroi kin poi kham bun sha ki nongkyndong: Conrad

0

Shillong, K’lyngkot, 25: Ar snem hadien ka jinglong nongmihkhmat jong u Bah Charles Marngar kum u MLA ka Mawhati Constituency, mynta ka kynti, u Myntri Rangbah ka Jylla u Conrad K. Sangma ha ka Sngi Saitjaiñ u la pynbna ba la plie paidbah ïa ka Mawhati Community and Rural Development Block (C&RD Block) ha ka jingïalang kaba la long ha ka shnong Umsohlait, Ribhoi District.
Ka Mawhati Community and Rural Development Block ka dei ka Block kaba 56 bad kaba dang khyllung bha napdeng ki Community and Rural Development Block kiba don hapoh ka jylla baroh kawei.
Ha kane ka sngi, la sakhi lang da u Myntri uba khmih ïa ka tnat C&RD Block u Abu Taher Mondal, u MLA jong ka Mawhati u Bah Charles Marngar bad u MLA jong ka Umsning u Dr. Celestine Lyngdoh
U Myntri Rangbah haba kren kum u Kongsan u la ong ba ka jingdon jong ka ophis jong ka Community and Rural Development Block ka wanrah ïa ka roi ka par sha kiba bun ki shnong kiba hap hapoh ka Mawhati ha kiba bun ki liang bad kan kyntiew ruh ïa ka roi ka par jong ki shnong ki thaw.
Kane ka Community and Rural Development Block kan pynmyntoi ruh ïa ki shnong kiba hap hapoh ka Umsning Constituency namarba 66 tylli ki shong jong ka Umsning ki hap hapoh ka Mawhati C&RD Block.
Shwa ban pynkut ïa ka jingïalang, u Myntri Rangbah bad kiwei kiwei ki kynrem ki lyndan ki la sam ïa ki M-Tabs sha ki samla pule class-11.

Leave A Reply

Your email address will not be published.