Ioh ka HANM ïa ki nongkitkam ba pura jong ka Women Wings : President ka Miliancy Wanniang & Secretary ka Kyrmenlin Lyngkhoi

Mawkyrwat, Naitung 22 : Ka Hynñiewtrep Achik National Movement (HANM) mynta ka sngi ka 20 tarik u Naitung, 2024 ka la ïoh ban pynthymmai bad pynskhem ïa ki nongkitkam jong ki ar tylli ki Circle, nangta ïa ka Women Wings’ jong ka South West Khasi Hills District, bad jong ki san tylli ki Unit ha kaba u bah Lamphrangsngi Kharbani, President jong ka HANM Central Body u la ïoh ban pyntiansmai bad u Pa’ïem N. Syiemiong u Syiem ka Hima Maharam kum u kongsan.
Lah ban kdew ba ka jingjied ïa ki nongkitkam ba thymmai kita ki long ïa ka Women Wings ha kaba ki nongkitkam ki long President ka kong Miliancy Wanniang bad Secretary ka kong Kyrmenlin Lyngkhoi, Mawyrwat Circle ha kaba la jied President ïa u bah Rishanskhem Lyngdoh bad Secretary u bah Teiborlin Wanniang, Mawpat Circle ki long President u bah Bialbas Paliar bad Secretary u bah Basil Paliar.
Nangta, Mawsaw Area Unit ki long President u bah Banshan Iawphniaw bad General Secretary u bah Exlander Thongni, Mawlangwir Unit ki long President u bah Ritngen Marweiñ bad General Secretary u bah Neraibon Lyngdoh, bad Mariem Unit ki long President u bah Baïaineh Thongni bad Secretary u bah Basil Paliar.
U Pa’ïem N. Syiemiong u Syiem ka Hima Maharam haba kren kum u kongsan u la ai jingmut ïa ka HANM ba kam dei tang ban pynkhlaiñ ïa ki tnad treikam tang hapoh jong ka Mawkyrwat Area hynrei dei ruh ban pynïar ruh ïa ki tnad hapoh Border ruh khnang ba kan long ka jingïarap ban wanrah ka jingïatylli bad ïalong kawei. Shuh shuh u la ong ruh ba ka jingdon ki Sengbhalang ka long ban wanrah ne trei ïa ka jingbha ha ka imlang ka sahlang bad khamtam eh ban ïatynrong lem ïa ka khia ka shon jong ki paidbah.
Ha kawei pat ka liang u la ong ba ki don ruh ki sengbhalang kiba pyndonkam bakla ïa ka bor namar kum u syiem ha ka jingtrei ne bat jong u ïa ka kam kum u Syiem jong ka Hima Maharam mynta la 33 snem ei ei u la dep ban ïa kynduh bad takhuh bun bah. “Ka jingïakhih ba nyngkong eh jong ki sengbhalang ban pyrshah ïa ki bar jylla ka dei ha u snem 1979 ha kaba ki samla ki la don ka jingïakhih kaba jur da kaba ki leit kiew ïa ki jingkhang jong ka Assembly bad kaba dei hapoh ka jingïalam jong u bah H.S. Shylla (bam kwai ha dwar U Blei)”, ïathuh u Pa’iem Niandro.
Ha ka jingïaid lynti jong u kum u nongsynshar, u sngewburom ruh ïa ki sengbhalang namar ba lada don kino kino ki mat jingïakren ne jingdawa kiba ïa takhuh ha ki shnong ki thaw ne wat ha ka hima ruh, ki sengbhalang ki da wan da ka lynti ban don shwa ka jingïakren bad ïasngewthuh jingmut. Ym tang kata, u la ai jingmut ruh ïa ka HANM ba kumba ka dei ka seng kaba khih ba ksar, kumta ruh ka dei ban trei ïa ka kam lyngba ka jingpeitngor ha kiba bun ki liang khamtam eh ha kaba ïa dei bad ki kynhun ha ki thaiñ border kiba don ka jingthmu ban pynkhie im biang ïa ka jingdawa Garo Land.
Namarkata, u la ai mynsiem ïa ki nongkitkam ba thymmai ba haba ki shim ban kit ïa ka lyngkor ban trei na ka bynta ka jingbha ha ka imlang ka sahlang dei ban trei da ka mynsiem bad jinglen-lade ryngkat ka jingtip-briew tip-blei.
Ha kajuh ka program la ïoh ban ai khusnam ruh ïa ki ar ngut kiba la ïoh ban pyllait im ïa ki saw ngut ki hep rit na ka jingngam jyllop.
Kiwei de kiba la ïadonlang ki long u bah Commander Shangpliang, President ka HFU Central Body kum u Symbud Kongsan, u bah W.L. Snaitang, Secretary Shnong Mawkyrwat, ka kong Victorial Syiemlieh, u bah Phasterlin Kharraswai, Myntri Shnong Nonglang, u bah P. Wahlang, Myntri Shnong Jakrem lem bad kiwei de ki riew rangbah kiba la shah khot sngewbha.