Nongpoh, Risaw 17: Ka ophis jong ka Project Director Meghalaya AIDS Control Society, Shillong haka jingïatrei lang bad ka ophis jong u Deputy Commissioner Ri-Bhoi District, mynta ka sngi ka la ïoh ban sdang ïaka Integrated Health Camp ban ai jingsumar ei sha ki paidbah bala pynlong ha ïing dorbar Ïewmawlong.
Ïa katei ka Integrated Health Camp la wan ban plie paidbah da u Bah Mayral Born Syiem MLA ka Nongpoh ba dei ruh u Chairman jong ka Meghalaya State Health Advisory Board kum u kongsan haka jingdonlang u Raja Brahma, Addl. Deputy Commissioner, Ri-Bhoi District kum u symbud kongsan, Dr. T Momin, DM&HO Ri Bhoi District, Dr. B Decruse, Project Director, MACS, lem bad kiwei kiwei ophisar naka tnad ka koit ka khiah bad ki tnad sorkar bapher bapher.
Ka jingplie ïa katei ka Integrated Health Campaign kaba la tip ruh kum ka Mela Health Camp kan wanrah shibun ki jingmyntoi haka ba ïadei bad ka koit ka khiah naka bynta ki paidbah nong shnong shnong kiba don mar khap bad katei ka health camp ha kaba ki lah ban leit ban check-up ïa lade ha ki jingpang bapher bapher khlem kano kano ka jingsiew.
Ha katei ka Health camp kin don ki Doctor bad ki nongtrei naka tnad ka koit ka khiah ban peit bad khmih ïaki jait jingpang bapher bapher naduh ka HIV, ki bniat, khmat, TB, ki jingduna haki dkhot met bad kiwei kiwei.
Ka Dr B Decruse Project Director ka MACS ka la ong ba ka thong jong katei ka Health Camp bala pynlong ryngkat ka jingtreilang bad ki tnad sorkar bapher bapher ka long ban ai jingtip sha ki paidbah halor ki jait jingsumar bapher bapher ba ka tnad ka koit ka khiah ka lah ban ai ka jingshakri sha ki paidbah naduh ka HIV, AIDS, TB, ka jingktah jong u duma bad kiwei kiwei ki jait jingpang namar ha katei ka jaka ki don ki doctor bad ki nurse kiba ban peit ban khmih ïaki nongpang, ha kaba ïa katei ka Health Camp yn sa pynlong ruh haki 66 tylli ki jaka bad ki shnong bapher bapher ka Ri-Bhoi District hapoh 20 sngi.
Naka liang u Bah Mayral Born Syiem haba kren ha katei ka sngi u la ong ba kum katei ka Health Camp ka long kaba kongsan ban ai jingtip sha ki paidbah halor ki jait jingsumar ba ki lah ban ioh naka sorkar bad kumjuh ruh ba kin tip ïaka jinglong jingman ka koit ka khiah haka met jong ki, da kaba kyrpad ruh sha ki paidbah ba kidei ban shim ïa katei ka kabu ban ioh jingsumar ei khamtam ba ki lah ruh ban ioh ka jingpeit bñiah ïa baroh ki jait jingpang da kaba ai jingïaroh ruh ïaka sorkar kaba la shimkhia ban kyntiew haki liang bapher bapher khamtam ba ka Ri-Bhoi District ka dei kawei naki district kaba la shah jied kum ka Aspirational District.
Hakawei pat ka bynta naka liang u Bah Mayral Born Syiem u la pynpaw ruh ka jingsngewkhia kaba jur halor ka jingnang jur ki kam sniew ha kane ka juk ba mynta naduh ka kam dih ba nalor ka jingpynjot ïa u briew bad ka imlang ka sahlang kala nangkyntiew ruh ?ïaka jingkynrei jong ka jingpang HIV haka jylla bad kane ka buh jingma kaba khraw bad donkam ban pynlong da ki prokram hikai bapher bapher ban pynsngewthuh sha ki paidbah.
