Shillong, Nailur 29: Ha ka jingrakhe ïa ka sngi rakhe ïa ka World Tourism Day, ka shnong Umden bad Mawphlang kiba na ka jylla Meghalaya kila ïoh ïa ka khusnam kum ki Best Tourism Villages Competition 2024 kaba la pynlong da ka tnad jngohkai jong ka Sorkar Pdeng.
Ha kane ka jingrakhe ka shnong Umden ka la jop hapoh ki kam shna jingshna ne Craft bad ka shnong Mawphlang ka la jop ha ki kam hiar pateng ne Heritage.
Halor kane ban kyntiew ïa ka kam jngohkai ha ki shnong kiba don ha kylleng ka ri India, ha u snem 2023 la sdang ïa ka jingïakhun Best Tourism Villages Competition ban peit bad ban ai jingithuh ïa ki shnong kiba pynneh bad kyntiew ïa ki jingdon jingem ha ka deiriti bad ka mariang lyngba ki jingngeit tynrai ha ka imlang sahlang bad ka jingïeng skhem na ka bynta ka jingïaineh ha baroh ki bynta.
Ka bynta kaba nyngkong jong ka jingïakhun Best Tourism Villages Competition ha u 2023 la ïohpdiang ïa ki aplikeshon na ki 795 tylli ki shnong, katba ha ka bynta ka baar jong ka jingïakhun Best Tourism Villages Competition, la ïohpdiang 991 tylli ki aplikeshon na ki 30 tylli ki Jylla bad Union Territory bad na kine 36 tylli ki shnong kila ïoh ïa ka jingithuh kum ki nongjop ha 8 tylli ki thup jong ka jingïakhun Best Tourism Villages Competition 2024.
