ïoh jingïarap palat 600 ngut lyngba ka Chief Minister’s Sports Scholarship Scheme

Shillong, Jymmang 01: U Myntri Rangbah ka Jylla Meghalaya u Conrad K. Sangma, ryngkat bad u Myntri ka tnad Sports u Bah Shakliar Warjri, ki la sam ïa ki scholarship ïa ki 614 ngut ki nongïalehkai hapoh ka Chief Minister’s Sports Scholarship Scheme na bynta u snem 2022-24 bad 2024-25.
Ha kane ka prokram ba la pynlong da ka tnad Sports jong ka Sorkar Jylla, ka la don ruh ka jingïalang kitbok kitrwiang ïa ka kynhun ïalehkai phutbol jong ka Meghalaya, kaba thmu ban mihkhmat ïa ka jylla sha ka Khelo India Youth Games 2025 ha Bihar.
Baroh ki don 614 ngut ki nongïalehkai na ki jait jingïalehkai bapher bapher kin ïoh ïa ka jingiarap bai bam (scholarship) man la u bnai naduh u snem 2024-2025. Ka kynhun jong ka Meghalaya kaba don baroh 44 ngut ki nongïalehkai bad 14 ngut ki nongpynïaid ban khmih ïa ka kynhun (official) ki ban ïashim bynta ha ki jait jingïalehkai bapher bapher ha ka Khelo India 2025.
Haba ai jingkren u Myntri Rangbah ka Jylla u la pynpaw ïa ka jingsngewkmen bad jingsngewhun ban ïohi kumno ka kam ïalehkai ka la nang kiew bad nangroi ha kine ki hynñiew snem ba la dep hapoh ka Sorkar MDA.
U la ban jur ba kane ka prokram, ka jingsam ïa ki scholarship, bad ka jingkyrshan pisa ki lah ban ktah jur, da kaba pynpaw ba wat tang ka pisa kaba tang khyndiat ruh ka lah ban wanrah ïa ka jingkylla. U la bynrap ba ka jingithuh bad jingsngewnguh ka long kum ka jingpynshlur kaba kor tam.
U la pynthikna ïa ki nongïalehkai ba ka sorkar ka sngew sarong ïa ki bad ka shimkhia ban weng ïa ki jingeh ba ki ïakynduh. U la pynpaw ba kumba 75-80% na ka pisa ha ki hynñiew snem ba la dep la mang na ka bynta ban tei ïa ki jaka ïalehkai, ryngkat ka jingkiew stet kaba la bynrap da ka Sports polisi jong ka jylla. Haba ban jur ïa ka jingdonkam jong ka rukom treikam kaba stad, u la kdew ba ka Meghalaya ka dei tang ma ka ka jylla kaba pyntreikam ïa kum kane ka prokram ithuh ïa ki sap (talent identification program) naduh ka rta kaba dang rit.
U la kam ba ka jingieid jong ki nongïalehkai ïa ka Sports ka la pynlong ïa ka sorkar ban trei shitom shuh shuh. U ïai ban ba kane kam dei tang ka jingpynlut hynrei ka jingbei tyngka, namar kan pynroi ïa ka jinglong jingman jong ka Sports ha ki 5 haduh 10 snem. U la pynshlur ïa ki nongïalehkai ban ïashim bynta ha ka Khelo India ba kin ai ïa kaba bha tam bad ban trei shitom.
Khatduh eh, u la sam ïa ka jingthmu ban pynpaw ïa ka Meghalaya ha ka ri bad ha ka pyrthei da kaba pynlong ïa ka National Games, da kaba kyntu ïa man la ki shnong ki thaw bad ki nongshim bynta ban ïasnohktilang ban ai ka jingkyrshan.
Na ka liang jong u Bah Shakliar Warjri – Myntri ka tnat ïalehkai jong ka sorkar Jylla, u la ai khublei ïa ki nongïalehkai bad u la pynpaw ïa ki jingthmu ba la sdang da ka sorkar Meghalaya ha kine ki khyndiat snem ba la dep.
U la kdew ïa ka STAR programme, ha kaba la pyrshang ïa 14,500 ngut ki nongïalehkai, bad ryngkat ka jingkyrmen ban pynmih ïa ki nongïalehkai ki ban paw ha ki national bad ruh ha ki kyrdan international.
Ha ka Khelo India Youth Games jong u snem 2023 kaba la long ha Tamil Nadu, ka kynhun ïalehkai phutbol jong ka Jylla ka la rah ïa ka nam lahduh da kaba jop ïa ka Punjab da 2-0 kol ha ka final, kaba pyni ïa ka jinglah jong ka jylla kaba nang kiew ha ki kam ïalehkai.
Ki riew rangbah kiba donlang ha katei ka sngi ki kynthup ïa u Richard Yanthan, Joint Secretary ka Directorate of Sports & Youth Affairs, u DD Shira, Director, Directorate of Sports & Youth Affairs bad u Bah John F Kharshiing, Working President, MSOA. La don lang ruh kiwei kiwei ki nongïalam jong ki synjuk ïalehkai bapher bapher, ki nongïalehkai bad ki para athlete.