Naduh ki kot khubor haduh ki rynsan social media ym ju duh kawei ka sngi ruh ban ym don ki khubor aksiden ka scooty bad kawei ka kali, lane aksiden para kali lane mynsaw jur ki briew na ka jingtakhuh ki kali, kine ki dei ki khubor kiba ki paidbah ha kawei ka liang ki sngewthait ban peit hynrei ha kawei pat ka liang ki kwah ban peit balei bad kaei ka daw ba poi haduh u pud ba poi ne jia katei ka aksiden. Kum kine ki jingjia ki ym tang ba ki wanrah ïa ka jingkyndit jong ki bahaiing hasem hynrei ka ktah ruh ïa ka jinglut jingsep khamtam lada jia ba ki ngat ha ka jingmynsaw kaba kham jur lane ka jingduh ei ka mynsiem briew.
Hynrei ym ju don pat ba pyrkhat ba ka jingñiah kali khlem pyrkhat kan ktah pat ïa ka jingim jong kiwei pat ki para briew lane ki nongshong kali. Ban pynsngewthuh ïa kane dei tang ka jingtehlakam ïa ka rukom ai license khnang ba kiba ïoh license kin dei tang kito kiba la da nang shisha ban ñiah kali ym kiba ïoh license shwa bad sa shu leit hikai shisngi arsngi bad sa ñiah pat ha ki jaka paidbah. Bun tylli ki longiing kiba la mad ïa ka jingpait dohnud haba ki mad ïa ka jingïap ba khlem dei por ki baieit ba thoiñ, khamtam lei lei haba ki ngat ne ïa tyngkhuh kum ha ki akisden kali tang na ka daw ka jingkhlem akor ka rukom ñiah kali jongno re. Ha kane ka jylla, kiba bun naki jingïap mynta ki wan ha kum ki aksiden kali, kaba teng teng ka dei namar ka jingñiah thurmur da lade, ne don pat ruh na ka rukom ñiah thurmur ki nongñiah.
Haba kren shaphang ka rukom ban ñiah ïa ki kali khamtam eh ha kine ki kali ar shaka mynta, ym lah ban khlem da buh ïa ka jingkylli, kiba bun na ki nongñiah nangno bad kumno sha ki la ïoh ban bat ha ki ïa ka driving licence, namar wat hapdeng kiba la ïoh ban bat ïaka, hynrei ka rukom ñiah kali ka jong ki, kam kdew pat sha katta ka phang ba kidei kiba la ïoh hok shisha ïa ka licence ñiah kali ka jong ki. Toi man la ka step don kiba bun ki briew ki bym pat ban nang ñiah ïa ki kali, ki pynlut ïala ka por ka jong ki ban hikai, hynrei ngi tip ba kum kine ki briew kiba da ïaid da ka lynti ban shah hikai, suki pa suki ki nang bad ki kham tip ïa ki aiñ ki kanun ban ñiah ïa ka.
Hynrei, ha kiba bun ki aksiden, lehse don ruh ki nongñiah ba shu nang malu mala, pynban khlem jingtieng ne smiej ki shu kurup ruma la kum kiba nang eh, hynrei haba la bang lei lei sa ka rukom ban pynher sted, tang katta ki thung khohmoh ne ba kin thung bajli bad ki syllad shisha kat shaba shah, bad ha kaba kut, poi pat sha ka jingjia ba sngewsih wat haduh u pud sha ka lynti jong ka jingïap. Kaba kham ima eh ïa ka rukom ñiah kali dei na ki khun samla kiba dang shu sdang ban khie, kaba ha ki, ka snam kumba ong ki riew tymmen ka dang khluit bha, katno tam lei lei haba ïoh ban rah ïa ki kali ba kham remdor, ki pynher la kum ki bym lap lieng shuh, hynrei kaba kut, haba ym lah shuh ban teh lakam, poi beit beit sha ka aksiden.
Nalor ba pynher sted, trei ruh sa ka dih ka bam, ka leh shongshit tem pynsawa jam sa ka tape kaba da shisha ym tang ba ka wanrah ïa ka jingma ïa kiba shong ne ïa u nongñiah, hynrei wat ïa ki briew kiba ïaid ha ki lynti ki syngkien, kaba teng teng shu shah syllad ei bad kylla dkoh ka kti ka kjat tang namar ka jingleh shongshit kaba shi khyllipmat ka wanrah pat ïa ka jynjar trah kaba shi rta ïa ki briew ba ïaid ba ïeng. Hangne la donkam shisha ba ki bor ba dei khmih kin hap ban thaw noh ïa ki aiñ ki kanun, ba ka rukom ban ai ïa ka licence ñiah kali, kam dei shuh ban shu ai klumar ïa ka, hynrei donkam shisha ban pyrkhing, ne haba ai ruh donkam ban da ïoh ïa ki kot ki sla na ki skul ai jinghikai ñiah kali ba la ithuh daka bor ba dei khmih. Pynban lada shu ai kumba ai ha kine ki sngi, da lei lei yn nym lah satia ban tem ïa ki jingjia aksiden kiba sngewsih, bad kaba kut ka shu sah khana ei pateng ïa kaei kaba la jia baroh.
Ha kawei ka liang ki lad jingpyrkhing ba la shimkhia da ka tnat Pulit ka la lah ba kan kham teh lakam bha ïa ki briew shoh khawiang kiba mlien ban shang kylleng sawdong ka sor man la ka miet. Ka jinglah ban talasi bha ki bor pulit ka la teh bha ïa u lakam ïa kito ki riew shang miet ha ka por ba ki la shoh bha u khawiang, namar kiba bun na ki jingjia ha ki por mynmiet, lada wad bñiah bha ïa ka daw, dei namar ba ka jabieng kam treikam shuh, katba ka kali pat ka la her sted shaba palat u pud tad haduh bym lah shuh ban tehlakam ïa ka, ha kaba kut, tynrah beit kat shaba poi.
Ka aksiden ka kham jia ruh haba ïa beh ïa ka por, haba ong beh por, ka kynthup naduh ka beh kam beh jam, leit jingleit sha jngai, hangne ruh, kum ki briew, ban lait na ka jingma, kan kham bha ban mih kham kylluid ka por, khampher wat lada dei ban poi kham kloi, hynrei ha kaba kut, ka mynsiem ka ïoh ba kan shong palei bad ym don jingeh ban ïoh ban pyndep ïa ki kam ha ka por kaba la buh. Kumta, ban lah ban kham tyngkan ïa ki aksiden kali, kaba nyngkong eh, donkam shwa ban ïa sdang nalade, da kaba long adkar bha ha ka rukom ban ñiah kali, kiar naka bam ka dih, kiar ruh na ka kren mobile bad kaba kham kongsan lei lei ka long ba wei haba la kiew ha ka kali haba thmu lei lei ban ñiah hi dalade, ka mynseim kan hap ban ïai long kaba palei, kaba pynleit jingmut shwa ban ñiah tikna ïaka tad haduh bña la poi ha ka jaka ba la dei ban ïeng, hadien kane la lah pat ha kaban phrang pat ïala ka jong ka bor jabieng sha ki kam kiba dei ban leh.
