Jowai, Jymmang, 01: Ka Sarot I Man, ka kynhun jong ki 11 ngut shiparalok, ha ka sngi Palei ka la hiar sha ka shnong Panaliar, Jowai ban ai jingïarap.
Ha ka jingïalang ba la pynïaid da u Assistant Waheh Shnong Bah Arwotki Sumer u la ïaroh ïa ka Sarot I Man da kaba ong ba ka burom ba la wanrah ki dkhot ka SIM kan ym kut tang ha ki, ka kynthup lang bad ka shnong ruh namar baroh ki dkhot jong ka kidei ki khun jong ka shnong kiba la trei borbah ha ka shnong naduh u Waheh Shnong uba dei uwei na ki dkhot jong ka.
La ïoh ka jingkren na ka liang ka shnong da u riew rangbah ba latrei slem bha ha ki kam shnong bad mynta u long kum u Executive Member, ma R. Thawmon Bamon. Ha ka jingkren u ma Bamon, ula ïaroh shikatdei eh ïa ka Sarot I Man. Kane ka dei shisha ka kynhun kaba la ïohi jngai na ka bynta ka bha ka miat ha ka imlang sahlang.
Ula ong ba, kumba ka shnong Panaliar, ka la pynmih ïa shibun bah ki Sap ki Phong ha ki khun jong ka, ym tang ha kawei ka laiñ, ha kiba bun ki laiñ naduh ka pule ka dangle, ka la pynmih ïa shibun ki Doctors ki Engineers bad kiwei kiba la trekam sorkar. Kadon shibun ki Business men, ki Nongrwai, nongthaw jingrwai, ki Film Director bad kiwei kiwei de. Kumta kane ka group Sarot I Man ruh, ba kidei ki khun ka shnong Panaliar, ki la ïoh ïa ka Sap ba pura ha kiba bun ki liang, la ong shuh shuh u ma Bamon. Ula ai kyrkhu kyrdoh ïa ka kynhun ha kajuh kapor u la ong, kaba sngewtynnad duh ka jong u, ka dei ba u latip ba kane ka group, ka shait ai jingïarap sngewbha da ka Snam sha ka Blood Bank. To u Blei un don ryngkat bad phi ha baroh ki liang, la pynkut u ma Bamon.
U Aziz War, MA, LLB, DIM. bashait long kum u Functional Manager ka DCIC, Jowai, ha kajuh kapor, udei u dkhot ba radbah ka Sarot I Man. Ula ai ka jingbatai shaphang ka jingsdang bad katto katne ki mat ba sngew donkam. U la ïathuh ba lasdang ïa ka Sarot I Man ha ka 25.12.2020 ryngkat lang bad ka Motto ne Imsngi -“KUNE HA I DÆ”. U la ong ba ka SIM, ha ka hi, baroh ki Dkhot kidei ban don kajuh ka kyrdan, wat lada ki ïapher ha ka kyrdan pule dangle nei kyrdan tre kyrdan ktah, kim ju don ka jingsngew ïapher uwei na uwei. U la ïathuh ba ha ki hi, kim da sngew donkam ban thung ne jied ïa u President ne Secretary namar baroh ki ïalong kajuh.
Ha ba khot ïa ki jingïalang, uno uno u dkhot bakam ban long ha ïing jong u, ma u hi, u dei u nongpynïaid bad ma u hi, un long u recorder. Kaba sngewtynnad ka long ba i ma A. War i la ong ba, ka SIM hi kan ym ïashim bynta ha ki kam saiñ pyrthei, hynrei kan ym khanglad ïa ki dkhot jong ka, ka mon laitluid ka jong ki bad ruh kin ym pan jingïarap na kiwei ba kin ai ïarap ïa kiba donkam jingïarap. Ki pynlong ka jingïa kynshew para maki, la ha kano kano ka dur ruh bad ki lei tai ïarap da ka lynti kaba ki lah ban ai.
U ma War u la ong ba ka SIM kadon ka jingmut naduh mynshuwa ban ai ïarap sha ka shnong Panaliar, tangba kim sngew ïahap ban ai da ki sopti kumba ki ai sha kiwei ki shnong, namar ba kane ka shnong ka dei ha sor. Hynrei, sngew donbok ba kiba bun na ki dkhot ki long ki nongtreikam shnong hapoh ka shnong Panaliar, ki la ïohi ka ei ka jingdonkam ba hakhmatduh ka shnong bad ka long ruh kaba lah ban ai na ka SIM.
Laïoh ïa ki kyntien ai khublei na u Marryngkat Syngkon, General Secretary ka Chnong Panaliar bad la pdiang ïa ka Podium na ki dkhot ka Sarot I Man da ki Executive Member ka shnong ha ka jingïalam u Assistant Waheh Chnong, ma Arwotki Sumer bad u General Secretary.
