Shillong, Jymmang 01: Haba bteng ban pynkhreh ïa ka aïom ïalehkai phutbol jong u snem 2025 na ka liang jong ka Shillong Sports Association [SSA] ha ka sngi Palei ka la khot ïa ki klob kiba lah ban ïashim bynta ha ka Third Division bad kumjuh ha ka U-20 Fourth Division ban pynrung kyrteng pura lada ki thmu ban ïashim bynta.
Ka lympung ïalehkai U-20 Fourth Division kan sdang naduh ka 02 tarik Jylliew. Ki rangïalehkai kiba lah ban pynrung kyrteng ki dei ban kha ha lane shuwa ka 01 tarik u Jymmang 2005.
Katba ka kyrdan ïakhun Third Division la buh ban sdang naduh 16 tarik Jylliew, 2025. Na bynta ka Third Division kan ym don kano kano ka jingkhang rta.
ïa ki phom ba la buh na ka bynta ban pynrung kyrteng ïa ki nongïalehkai lah ban shim na ka ophis jong ka SSA ha madan Polo hadien ba la dep siew ïa ka bai rung. Ka tarik ba khadduh ban siew ïa ka bai rung kan long ha ka 10 tarik Jymmang na ka bynta ka U-20 Fourth Division bad 17 tarik Jymmang na bynta ka Third Division ha ka por 5 baje janmiet.
Yn nym pdiang ïa ka jingthep kyrteng hadien kane. Nalor kata, ki klob ki la dei ban siew ban pynthymmai ïa ka jingïashim bynta na bynta u snem 2025 khnang ban ïoh ban ïakhun.
