Ïoh Best Asian Film ka phlim u Bah Pradip Kurbah ha ka 47th Moscow International Film Festival

Shillong, ïaïong, 25: U nongshna phlim uba la ïoh khusnam na ka jylla Meghalaya Bah Pradip Kurbah u la ïoh ïa ka jingïaroh hakhmat ka pyrthei da kaba ïoh khur ar tylli ki khusnam ha ka 47th Moscow International Film Festival. Ka phlim khasi kaba u la ai kyrteng, “Ha Lyngkha Bneng’ ka la ïoh ïa ka khusnam Best Film, katba u Bah Pradip Kurbah u la shah pynkup burom da ka khusnam Best Director.
Ïa ki khusnam la ai da ka Network for the Promotion of Asian Cinema (NETPAC), ka kynhun kaba ju ai jingithuh shi sien shi snem ïa ki phlim ba kit jingmut kiba la pynmih na ka thain Asia-Pacific.
Ka Kurbah Films ka la pynpaw ïa ka jingkmen ïa kane ka jingjop bad ong ruh ba ka phlim “Ha Lyngkha Bneng” ka la sdang da ka jingïaid lynti da kaba jop ïa ka NETPAC Award for Best Asian Film ha ka 47th Moscow International Film Festival.
“Kane ka jingïaid lynti ka la long kaba phylla. Ha Lyngkha Bneng ka dei ka jingïathuhkhana kaba la rung jylliew ha ka ri jong ngi, ha ka jaitbynriew jong ngi bad ha ki jingkynmaw jong ngi. Ka jingïoh jingithuh ha ka rynsan hakhmat ki ri ka pyrthei ka pynkynmaw ba ki khanatang na ka thain Shatei Lammihngi ki don ka jaka ha ka pyrthei,” la pynpaw ka Kurbah Films ha u kyrwoh.
“Kine ki khusnam kim dei tang ki jong ngi—ki dei jong ki nongïashim bynta kiba tbit kiba la aiti lut met bad mynsiem ha kane ka phlim. Ïa kawei pa kawei ka kam la pynwan dur da ka jingaiti, ka jingstad bad ka jingngeit ha ka jingïathuhkhana kaba ngi la thmu ban ïathuh. Phi long ka dohnud jong kane ka jingjop,” la bynrap u kyrwoh.
“Ngi pynpaw ruh ka jingai khublei sha ki nongpeit, ki nongbishar bad sha baroh kiba la ai jingkyrshan,”
U Myntri Rangbah ka Jylla Conrad K. Sangma ha u kyrwoh, u la ai khublei ïa u Bah Pradip Kurbah halor kane ka jingjop jong u bad ong ba kane kan long ka jingsarong kaba khraw haduh katta katta ïa ka jylla.
“Kane ka burom ka ban sah jingkynmaw ym tang ha ka jinglehkmen ïa ka sap batbit jong u (Bah Pradip) hynrei kan long ruh ka jingsngew sarong ïa ka kolshor jong ngi bad ka jingtei nam ki menbarim. Lyngba ka jingïathuh khana jong u, u la wanrah ïa ka jingriewspah ïa ka thymmei jong ngi hahmat ka rynsan jong ka pyrthei, ban pynkynmaw ïa ka pyrthei ïa ka jingithiang bad ka jingkordor ka jylla jong ngi,” ong u Sanmga,” ha ka rynsan X.
“Ki kam jong u Bah Pradip ki la ai mynsiem, ki la kyntiew bad ki la plie lynti ban nang sei shuh shuh ïa ki khana ban ïathuh. Ka jingjop jong u, kan paw ba baroh ka long kaba lah ban leh haba ka mon ka angnud ban leh ïa kam,” la ong u Myntri Rangbah.