Ka elekshon MDC mynta ka kynti imat kan syllad bad wanrah shisha ïa ka jingkylla kaba khraw ha ka rukom jied ia ki nongmihkhmat kaba shisien san snem la ka long naduh ka elekshon MDC ha Khasi Hills Autonomous District Council (KHADC), nangta ha Jaintia Hills Autonomous District Council (JHADC) bad kumjuh ruh ha Garo Hills Autonomous District Council (GHADC). Ki dak ki shin ki la paw shynna naduh ka elekshon MP kaba dang shu dep ha kaba ki kyrtong MP kiba pynieng da ki party kiba don ha ka sorkar ki la khyllem lut, kynthup naduh ka kyrtong ba pynieng da ka NPP, ka Dr. M Ampareen Lyngdoh bad ruh haduh u kyrtong ba pynieng da ka UDP, Bah Robertjune Kharjahrin.
Kaba pynkyndit lut ïa baroh ka long ba kitei ki party watla ki don bun ngut ki MLA hynrei haba niew pat ïa ki vote kam ïahap satia. Kawei pat ka long ba lada peit na ka jingïoh vote u kyrtong ka VPP na Shillong bad u Saleng Sangma na Tura, ka rukom ïoh vote jong ki ka la long kaba pynlyngoh lut. Lada phai ha Shillong, katei ka party kaba don tang 4 ngut ki MLA bad shong ha ka Liang Pyrshah hynrei ka la lah ban pynkhyllem ïa ki kyrtong kiba don da ki phew ngut ki MLA nalor ba ki don ruh ha ka bor. Nalorkata, lada phai pat kum ha Tura, watla ka Congress ka don ha ka Liang Pyrshah bad don tang uwei u MLA na rilum Garo hynrei ka la ïoh pat ban pynliem lut wat ïa ka party kum ka party NPP kaba don da ki phew ngut ki MLA.
Kiba kum kine ki jingjia ki la pynktik ruh ïa ka jingmut jingpyrkhat u paidbah ba kane kam dei satia ka lyer jongno jongno hynrei ka dei ka jingkwah jong u paidbah ban ïohi noh ïa ka jingkylla ha ka saiñpyrthei da kaba sdang shwa na ka elekshon MDC. Kumta kane ka la pynlynga mynsiem ïa kiba bun ki kyrtong khamtam kito kiba thmu ban aireng ha kane ka elekshon MDC, khamtam haba ki ïohi ba ki paidbah kim da kwah ne noh shuh ka mon ban leit sha ki jingïalang ba khot da ki seng sainpyrthei ba don ha ka Liang Synshar.
Tangba ha ka saiñpyrthei pat ym lah ban len ba ka jingkylla ka lah ban jïa ha kano kano ka por bad ka lah ruh ba beh ha kano kano ka por. Ym lah ruh ban ong ruh ba ïoh ka lyer ka jingkylla kan beh kumba beh ka lyer tlang sha ka lyer synrai ne sha ka lyer lyiur. Kaba sah mynta ka long ban peit haduh ba ka sorkar ka pynbna noh ïa ka tarik long elekshon MDC bad dei hangta yn sa lah ban ïohi ba haduh katno kata ka jingkwah jingkylla jong ki paidbah kan treikam khamtam eh kum ha rilum Khasi bad Jaintia kaba donhaduh 58 tylli ki constituency. Lada baroh ka jingpyrta jingkylla kan dang neh bad kan bteng haduh kane ka elekshon MDC lehse khlem pep bun ki dur khmat ba thymmai kiban mih naduh ka samoi ban wan.
Kane ka jinglong jingman mynta ka pynlong ruh ïa ki MDC ba mynta ba kin sdang khih khohreh bad kyndit bynriew khamtam haba ki ïohi ba ka result jong ka elekshon MP ka long lut da khongpong. Kaba kham pynrit mynsiem eh kadei ïa ki MDC kiba don ha ka Liang Synshar kiba mynta ki hap ban leit kylleng ban pynsngewthuh ïa ki paidbah katba dang biang ka por ryngkat ka khroh ka kjor ba kin ai bïang ka jingkyrshan ïa ki ha kane ka elekshon kaban wan kaba lah ban long mynta u snem lane ha u snem ban wan.
Ha kawei pat ka liang, ki kyrtong kiba dang mih thymmai ki sngew ïoh mynsiem haba ki ïohi ba mynta ki paidbah kim da khmih lynti shuh ban ïoh bai sha ne bai leit jingïalang naba wat ïa ka bai kali ruh ki la pynlut hi naka pla lajong. Lada ka long kumne lei lei kan pynduh thiah duh dem ïa kito ki kyrtong kiba thmu ban ïakhun elekshon da ka bor pisa. Kawei pat ka long bad kaba i tieng ka long ba ïoh khatduh ki paidbah ki ngop pat ha ka jingshah pynbiej ha shwa ka elekshon kumba ju long ha ki elekshon ba la dep. Namar lada long kumno kumno lada nujor ïa ka elekshon MLA bad ka elekshon MP ka la ïapher baklybak namar ha kaba kut ki kyrtong ki hap ban pynleit jingmut ha la ki jong ki jongki constituency bad kim don por shuh ban leit ïarap ne leit ïalap elekshon kylleng kumba long kum ha ka elekshon MP.
