Shillong, Nailar 01: Ka jingapkhmihlynti jong ki paidbah ka jylla ban sakhi ïa ki jingïalehkai ka lympung kan urlong mynta ka sngi Thohdieng ha kaba u Myntri Rangbah ka Jylla- u Conrad K Sangma un sa plie ïa ka wat ïakhun jong ka 133rd IndianOil Durand Cup ban long ha nongbah Shillong mynta ka sngi (02 tarik Nailar, 2024) hashwa ka jingïalehkai ba nyngkong ban long hapoh Jawaharlal Nehru Stadium (ka madan kaba dang shudep maramot thymmai) hapdeng ka Shillong Lajong FC pyrshah ïa ka Tribhuvan Army Football na Nepal.
Yn sdang ïa ka prokram plie pyrda ryngkat ka jingpyni nam bapher bapher kiba itynnad. Lah ban kdew ba kane ka dei ka sien kaba nyngkong ba ka Durand Cup, ka lympung ba la paw ban ïoh pynlong ha Meghalaya, ka jylla kaba ieit bad shongshit bha ïa ka phutbol. Ha kane ka sngi yn ïadonryngkatlang u Air Marshal S P Dharkar, PVSM, AVSM, Air Officer Commanding in Chief, bad u Lt. General Ram Chander Tiwari, UYSM, AVSM, SM, GOC-in-Chief, jong ka Eastern Command.
Ha ka prokram plie pyrda yn pynbyrñia da ka jingpyninam ‘Air Show’ ban bud sa ka ‘Bhangra bad Gatka’ da ka kynhun shipai 2nd bad 13th Battalion jong ka Sikh Regiment. Nangta yn bud sa ka jingñiah thuk thuk kaba i shyrkhei lane ka daredevil Motorcycle Show da ka kynhun shipai jong ka Corps of Military Police. Yn bteng ïa ka prokram da ki jingrwai bad jingshad, na ka kynhun jong ka Children Choir bad ka jingshad bad jingrwai “Badloo Ram Ka Badan” da ki khynnah shynrang ka Assam Regimental Centre.
Khadduh, yn pynkut ïa ka prokram da ka jingrwai ban ai da ka kynhun ki khynnah skul jong ki jaka pule bapher bapher na Shillong kiba don haduh 800 ngut (Musical Ensemble). Hadien nangta, u Myntri Rangbah ka Jylla un sa hiar ha madan ban kynduh bad ai khublei ïa ki player shuwa ban sdang ka jingïalehkai na ka Group F, ha kaba baroh hynriew tylli ki jingïakhun kin long ha nongbah Shillong.
Ka jingplie pyrda kan kynthup ruh ïa ka jingïaid ban pyni paidbah ïa ka lama jong ka lympung ryngkat bad ki khusnam (trophy).
La thmu ruh ban pynbyrñia da ka put ka tem hadien ba la wai shiteng, ha kaba ki nongrwai kum ka Gracyl bad Dapelai, Lamphang & Choir kin pynshongshit ïa ki nongpeitkai da ki jingrwai.
Lah ban kdew ba ka nongbah Shillong ka ïoh ban pynlong ki jingïalehkai ki kynhun na ka thup jong ka Group F, kiba kynthup ïa ar tylli ki kynhun ISL, ka FC Goa bad ka Hyderabad FC ryngkat ka Shillong Lajong FC bad ka Tribhuvan Army Football Team kaba na Nepal.
