Ïeng skhem beit ka KAAC ban ïa pynbeit pud pynbeit sam katkum ka Notification 1951

Nongpoh, Jymmang 14: Kumba ki ar tylli ki sorkar jylla, kata ka sorkar Meghalaya bad ka sorkar Assam ki la don ha ka lynti ban ïa pynbeit pat ïa ki pud ki sam ba dang kajia ha ka kynti kaba ar, ka Karbi Anglong Autonomous Council katkum ka jingoh lum jingtip ha ka sngi Saitjain ka la khot la wer naduh ki seng sainhima, ki seng bhalang bad kiwei kiwei ki seng treimon sngewbha na ka bynta ban ïatai halor katei ka kam pynbeit pud pynbiet sam ka Meghalaya bad ka Assam.
Ka jingtip ba la ioh lum, la ong ba ka Karbi Anglong Autonomous Council ka la khot kyrpang ruh ïa kane ka jingïakynduh lang naduh ki seng sain hima sima, ki seng bhalang bad kiwei kiwei ki seng treimon sngewbha, ka long ban ïa kren kyrpang halor ki jingeh ki jaid Karbi kiba dei halor ki kam pud ki kam sam bad ki jingeh ki paidbah ha khappud ba hap ha u pud u sam jong ka Karbi Anglong Autonomous Council hapoh ka jylla Assam.
La ong ruh lyngba kane ka jingïakynduhlang ki seng sain hima sima, ki seng bhalang bad ki seng treimon sngewbha hapoh ka Karbi Anglong Autonomous Council ki la ïa kren kyrpang ruh ym tang ïa ki kam pynbeit pud pynbeit sam, hynrei ki la ïa kren ruh halor ki jingeh jong ki paid Karbi ha ki khappud da kaba ki la seng kyrpang ruh da kata ka Border Protection Vigilance Committee ban peit kyrpang ïa ki jingeh ha khappud ba ju mih ka jingïakajia kum ha ka thain Khanduli, Block I bad Block II.
Ka jingtip ba la ioh lum la ong ruh, katkum katei ka jingïakynduh lang ha katei ka sngi Saitjaiñ ha Diphu, ki la shim ruh ka rai kaba kyrpang ba ha kane ka kam ïa pynbeit pud dei ban shim beit katkum ka Notification jong u snem 1951 ha kaba shim ïa ki jaka ki puta bad kin nym pdiang lada kim shim katkum katei ka Notification jong u snem 1951.
Shuh shuh, kane ka long ka jingïatrei lang naduh Karbi Anglong Autonomous Council, ki seng sain hima sima, ki seng bhalang, ki seng treimon sngewbha bad ba la ïa trei lang ruh ryngkat ka sorkar Assam, ong ka khubor ba la ioh lum na katei ka rai jong ka jingïalang kaba la long ha Diphu.