Tang ka Dr. Ampareen ba jop na ki 6 ngut ki MLA ba wan ïakhun na NPP

Shillong, Jymmang 14 : Na ki 6 ngut ki MLA na ki lai tylli ki seng saiñpyrthei na rilum Khasi – Jaiñtia kiba mih noh na ki party ba ki don bad jied ïa ka National People’s Party ha kane ka elekshon ba dang shu dep, dei tang ka Dr. Ampareen Lyngdoh kaba ïoh ban bteng ïa ka jinglong nongmihkhmat jong ka.
Kumban shu phai dien, ki la don haduh lai ngut ki MLA jong ka Congress, ba kynthup ïa ka Dr. Ampareen na Shillong East, Bah Mohendro Rapsang na Shillong West bad u Bah Kimfa S Marbaniang na Rambrai kiba la wan ban pynïasoh sha ka NPP bad ïakhun ruh na katei ka party ha kane ka elekshon. Hynrei na kitei ki lai ngut dei tang ka Dr. Ampareen kaba la poi sha ka thong bad ïoh ruh ban don mynta ha ka kynhun Myntri ba dei peit ïa ka tnad ka Koit ka Khiah bad ka Rep ka Riang.
Ki arngut kiwei pat ki MLA ki kynthup u Bah Jason Sawkmie Mawlong na Umsning constituency bad u Bah Hamlet Dohling na ka party PDF. Hynrei kitei ruh baroh arngut ki la mad noh ïa ka jingshah rem.
U MLA ba khatduh ban mad lang ïa katei kajuh ka jingshem dei u Bah Samlin Malngiang uba hadien ba u la resain noh kum u MLA ka HSPDP u la pynïasoh sha ka NPP bad aireng ha kane ka elekshon MLA kaba dang shu dep shen kaba ka jingniew vote la pyndep ha ka 13tarik u Jymmang.
Dang shen na ka liang jong ki saw ngut ki kyrtong ki la pynpaw ïa kajuh ka jingsngew kyndit bad sngewlyngoh haba ki mad ïa katei ka jingshah rem kaba kim shym la poi pyrkhat satia. Wat na ka liang u Bah Samlin haba kren ha ka sngi Saitjaiñ kaba dei ka sngi ñiew vote u la pynpaw ba watla u la trei hok bad wanrah shibun ka roi ka pa na bynta ka constituency hynrei baroh kitei kim shym la poi shaei shaei ruh.
Halor kane, haba kren bad katto katne ki riewshemphang ha ka saiñpyrthei ki la ong, “Haduh mynta ym lah shuh ban ong kaei ka daw kaba pynlong ïa kitei ki 5 ngut ban shah rem. Ym lah shuh ruh ban sngewthuh ïa ka jingmut jong ki paidbah hato dei ba kim mon ïa ka party ne ïa u kyrtong.”
Uwei na ki nongïalam ka NPP (bym kwah ban pynpaw kyrteng) haba kren halor kane ka bynta u la ong ba ha ka jingshisha kitei baroh kitei ki kyrtong kiba wan ban ïakhun na ka party ki la trei bha ha ki san snem ba la dep hynrei na kano ka daw ki paidbah pat ki pynrem noh ïa ki.
“Lehse ïa kane ka bynta ruh ngi hap ban wad bniah khnang ba ngin ïoh pat ban pynkhreh bha na bynta ka elekshon MDC kaban sa long shen ha kine ki khyndiat bnai ban sa wan,” u la ong.
Haba jubab halor ka jingkylli, u la pynpaw ba kum u nongtrei party ki donkam ban wad bad tip ïa ka daw tynrai kaba ktah ïa ka party khamtam ha rilum Khasi bad Jaintia.