Nongstoiñ, Lber 30 : La kumba katto katne snem ki sawphew tylli ki long ïing kiba dei ki trai jong ka khyndew Nongstong, kaba kaba dei ruh ka rikynti bad ki sanphew phra tylli ki long ïing kiba dei ki trai jong ka khyndew Nonglang kiba don mar syndah, kiba ka wah Tyrsung ka long kum u pud u sam naduh mihngi haduh sepngi ki la ïatreilang, ha kaba ki la thung ruh da ka joint committee ka ban peit ïa ka jingtrei kam ha kiba bun ki liang.
Nalor kata ka don sa kawei pat ka kynhun kaba dei ka synjuk jong ki rawon kaba la tip kum ka Nonglang Pungsier Anglers Association kaba la seng naduh u snem 2006, kaba peit bad ïada na ka jingpynïap pathar ïa ki don um doh wah ha ka wah Tyrsung bad ki shnat jong ka.
Kumta hadien ba kitei ki ar tylli ki seng khyndew ki la thung ïa katei ka committee, na ka liang ki nongïalam ka NPAA ki la pan ïa ka jingkyrshan bad ka jingïatreilang bad na ka liang ki ar tylli ki seng khyndew ruh ki la pdiang sngewbha bad mynjur ban ïatreilang ha ka ban ïada bad pynneh pynsah ïa ka mariang bad baroh ki jingthaw ba im ha um bad ha ryngkew ruh kumjuh.
Ha kine ki sngi hadien ba la ïoh jingtip ba ki don ki riew shim kabu kiba pynkheiñ ïa ki kyndon ba ka NPAA, ki ar tylli ki seng jong ki trai khyndew ki la mana bad pyrkhing bha kum kaba pynïap pathar ïa ki doh um, siat pathar ïa ki mrad, pom pathar ïa ki dieng ki siej bad thang dusmon ïa ki khlaw bad ki lum.
Ha ka jingleit jurip la pyrshang ban bud ïa katei ka wah bad haba la poi ha kawei ka jaka kaba la ju tip kum ka riat thiah shrieh, la lap ïa ki dak ki shin ba ki riew shim kabu ki pynrngad ïa ka um da kaba set na ki jaka ba khim bad pynkhlad noh shawei bad kem lut ïa baroh ki jait doh um. Nalor kata ha katei ka jaka ki don lai ngut ki rawon na ka shnong Nonglang kiba dang muja ka khwai.
Haba hiar shuh shuh kham kham sharum jong katei ka jaka la lap ïa ki briew kiba leh da katei ka juh ka buit ban pynrngad ïa ka um. Ha katei ka jaka ki don arngut ki rangbah nangta ki khynnah kiba la don ha ka karta khatlai haduh khatsan snem nangta ki kynthei kiba dang muja ban set ban pynrngad ïa ka um.
Haba la ïohi ïa kitei ki briew la leit ban ïawer ïa kitei ki rawon ban leit pynsangeh, hynrei haba la leit bad kyntu ïa ki ba ki dei ban sangeh noh ïa katei ka kam kitei ki briew kim sngap satia hynrei ki la pyneh ïa la ka jong ka nia. La pyrshang ruh ban pynsgewthuh ba la khang pyrshah ban leh ïa kaba kum katei ka kam hynrei kim patiaw ei ei.
Ha katei ka sngi la leit ban ïakynduh ïa ki nongïalam ka NPAA ha Nonglang bad ha katei ka jingïakynduh la ïadon lang da u bah K.B.Syiemlieh president, bah R.L.Nonglait Secretary ka NPAA, ba Usefulson Wanñiang secretary ka Joint Committee jong ki ar tylli ki seng trai khyndew Nonglang bad Nongstong bah Blurenshon Wanñiang dklhot ka Joint Committee bad kiwei kiwei.
U bah K.B.Syiemlieh u la ong ba ka NPAA naduh ba la seng ka la ïaleh katba lah ban pahara ïa katei ka wah, ba ki riew shim kabu ban pynïap pathar ïa ki doh um kin ym ïoh lad. Ki la don ruh shibun kiba la shah kem ha ka seng, hynrei namar ka jingbym don ïa ka aiñ kaba thikna ban pynshitom, ki riew shim kabu kim sheptieng satia bad ki pyrshang ban leh ïa kitei ki kam ha ki sngi ba don ki kam ha poh shnong Nonglang namar ba ki tip ba ym don ba wan pahara ha katei ka wah.
Ha kajuh ka por u la kyntu ïa ki riew shim kabu ba ki dei ban sangeh noh shisyndon ïa ki kam pynjot pathar ïa ki don um. Kane ka dei ka jingkyntu kaba khatduh bad lada jia ba nangne shakhmat yn dang lap ïa kiba ïaleh pyrshah ka seng kan ym bishar shuh da lade hynrei kan phah noh beit beit sha ki bor ka aiñ ba kan leh ïa kaba don kam.
U bah Usefulson Wanñiang secretary jong ki ar tylli ki seng trai khyndew pat, u la ong ba naduh ba ka NPAA ka la kyrpad ban ïatreilang ka Committee jong ki ar seng khyndew ka la shimkhia bad ka la ju buddien ruh ban ïoh kem ïa ki riew shim kabu kiba thang dusmon ïa ki khlaw bad ki lum, kiba pynïap pathar ïa ki doh um ha ka wah Tyrsung bad ki shnat jong ka, kiba siat pathar ïa ki mrad bad kiwei kiwei.
