Ïasyllok ki nongrep ha ka Kisan Diwas ban kyntiew ïa ka bha ka miat ka kam rep jong ki

Shillong, K’ Lyngkot 25: Ia ka Kisan Diwas la rakhe ha Meghalaya ha ICAR Research Complex for North Eastern Hill Region, Umïam, bad ICAR-Krishi Vigyan Kendra (KVK), West Garo Hills.
Ïa kane ka Kisan Diwas la rakhe kumjuh ruh ïa ka sngikha jong u late Chaudhary Charan Singh, u Myntri Rangbahduh barim ka India bad uba dei u nongkyrshan uba ratbah bha na ka bynta ka daw bah ïa ka bha ka miat jong ki nongrep ha ka ri.
Ha Umïam, la pynlong ïa ka prokram pynsngewthuh paidbah haba ïadei bad ka jingtyrwa ban bujli noh ïa ka MGNREGA. Ïa kane ka prokram la wan ban shim bynta da Director ka jaka pule, ki scientist, ki technical officer, ki administrative staff, bad kumba 300 ngut ki nongrep na Ri Bhoi district jong ka Meghalaya. Ïa kane ka prokram la pynlong kum shi bynta na ka prokram ba la pynlong ha baroh kawei ka ri bad kumjuh ha kylleng ki 113 tylli ki jaka pule ka ICAR bad 731 tylli ki Krishi Vigyan Kendras (KVKs) ban thaw ki lad jingpynsngewthuh hapdeng ki nongrep halor ka jingtyrwa ban wanrah jingkylla haba ïadei bad ki kam ai bylla kiba hapoh ka jingïohi jngai ka Viksit Bharat.
Na ka liang ki Scientist jong ka ICAR NEH Region ki la batai ïa ki phang ba kongsan bad ki nongrim halor kane ka bill ba la tyrwa bad kiba ïadei bad ka North Eastern Hill region, ha kaba ka rep ka riang ka long u budlum ka ïoh ka kot ka kamai kajih ha ki thaiñ nongkyndong. Ki la pynpaw ba kane ka bill ka ïasoh ba ki prokram ai kam ha ki thaiñ nongkyndong bad ka jingïohi jngai jong ka ri lyngba ka Viksit Bharat 2047.
Ïa ka program la pynkut da ka jingïalang ïasyllok bad ka jingsam ïa ki tiar ai jingtip, ka jingpynskhem biang ïa ka jingangnud ka ICAR bad ka roi ka san kaba neh ha nongkyndong ha baroh kawei ka ri.
Ha shilynter jong u juh u laiñ, ki la don haduh 107 ngut kiba la shim bynta bad kiba la don ha ka prokram ha WGH. Kane ka prokram ka ai ka rynsan ïa ki nongrep ban sam ïa ki jingleh kiba shem thymmai, ki khana jong ki jingjop bad ki kam ba ïadei bad ki rai kiba la pynbun ïa ki jingpynmih bad ka jingkiew ha ka ïoh ka kot ha ka thaiñ.
Na ka liang ki specialist na ka KVK ki la pynshai halor ki jingshem thymmai ha ka kam rep kam riang, ka jinglong ka suiñbneng haba ïadei bad ka rep ka riang bad kiwei kiwei ki tiar ban pyndonkam katkum ka juk kaba mynta.
Ïa ki nongrep la pynshlur ban buh ha ki jingthoh bad ban sam ïa ki jingmut khnang ba kin lah ban pynbha bad kyntiew kham khraw ïa ki jingïoh jingmyntoi.