ïasuk ki ar shnong weng noh ka sorkar ïa ka jingpyrkhing leit jngohkai sha Kshaid Weisawdong

Shillong, Naitung 14 : Ka Sohra Civil Sub-Division ka la weng noh ïa ka jingpyrkhing ba la pynjari ha kshaid Weisawdong hadien ba ki nongmihkhmat ka shnong Laitduh bad Umblai ki la poi sha ka jingïasngewthuh jingmut halor ki jingïakajia.
Ka kshaid Weisawdong, kawei na ki jaka jngohkai ba leitkai bha ki nong wan jngohkai kaba don hajan Sohra, ka la pawnam namar ka jingdon ïa ka kshaid ba lai kyrdan bad ka ju khring da ki hajar ngut ki nongleitkai manla u snem.
U Sub-Divisional Magistrate Mark A Challam, ula pynsangeh noh mardor ïa ka hukum hapoh ka kyndon 163 jong ka Bharatiya Nagarik Suraksha Sanhita (BNSS), 2023, haba pynpaw ba kam don shuh kano kano ka jingsyier ban mih ki jingkulmar.
ïa kane ka jingpyrkhing la pynjari naduh ka 3 tarik Naitung ban tehlakam ïa kano kano ka jingkulmar kaba mih na ka jingïakajia pud hapdeng kine ki artylli ki shnong ha katei ka jaka jngohkai ba pawnam tam ka Jylla.
Kat kum ka hukum, ki nongmihkhmat na baroh artylli ki shnong la shah khot sha ka jingïalang da ki bor pynïaid ka Sohra Sub-Division, ha kaba ki la ïa pynbeit ïa ki jingïapher jingmut bad ïa mynjur lang ban pynneh ïa ka suk ka saiñ.
Da ka jingweng noh ïa ki jingpyrkhing, baroh ki jingpyrkhing bala pynjari da ka hukum ba mynshuwa kin ym treikam shuh.
Ki bor pynïaid ka Sub Division ki la pynshai ba kane ka jingweng ïa ka hukum kan ym khanglad pat ïa ki bor ba dei khmih ba kin shim ïa ki sienjam kat kum ka aiñ lada don kano kano ka jingpynkulmar lane pynthut ïa ka leit ka wan u paidbah.