SHILLONG, Jymmang 31: U Myntri Sorkar Pdeng ba dei peit ïa ka Tnad Sports & Youth Affair, u Dr. Mansukh Mandaviya ha ka sngi U Blei u la ïashim bynta ha ka bynta kaba 76 jong ka ‘Sundays on Cycle’ hapoh ka Fit India Movement ha Shillong.
Kane ka prokram kaba thmu ban pynsaphriang ïa ka khubor jong ka jingkoit jingkhiah, ka jingïaineh bad ka rukom im kaba koit ba khiah lyngba ka jingñiah cycle, ka la sakhi ïa ka jingïashim bynta shitrhem na ki samla kiba sngewtynnad ban kilanmet.’
Kiba la donlang ha kane ka prokram ki kynthup ïa ka Myntri Khynnah jong ka Sorkar pdeng ba dei peit ïa ka Tnad Sports & Youth Affairs ka Raksha Khadse, u Myntri ka tnad ïalehkai jong ka jylla Meghalaya-Bah Wailadmiki Shylla.
Haba ai jingkren ha kane ka jingïalang, u Dr. Mandaviya u la ong, “Ka jingñiah cycle kadei kawei na ki rukom kilan met kaba bha tam bad ka ai jingmyntoi shibun ïa ki paidbah, kynthup ka jingpynduna ïa ka jingjaboh, ka jingtyngkai ïa ka umphniang bad ka ïarap ban pynduna ïa ka jingkhapngiah kali”.
U la ong ba ka jingñiah cycle kam dei tang ka kam ba ïadei bad ka jingkoit jingkhiah hynrei kadei ruh ka lad kaba biang ban weng ïa ki katto katne ki jingeh ha kane ka juk, kaba pynlong ïa ka kum ka lad kaba bha na ka bynta ka lawei kaba kham khlaiñ kaba kham biang bad kaba kaba kham ïaineh.
U Myntri Sorkar Pdeng u la ong ba ka Sundays on Cycle ka la nang kylla sha ka jingïakhih ha ka ri baroh kawei hapoh ka sienjam jong ka Fit India, ha kaba da ki lak ngut ki briew ki la ïashim bynta ha kylleng ka ri man la ka Sngi U Blei.
Haba kren shaphang ka jingkiew ka kam ñiah cycle ha kane ka thaiñ shatei lammihngi, u la pynshlur ïa ki samla ka jylla Meghalaya ba kin shim ïa ka jingñiah cycle ym tang kum ka lad ban ïoh ïa ka koit ka khiah hynrei kum ka jingïalehkai bad ka rukom im.
Katba ka jylla Meghalaya ka pynkhreh ban pynlong ïa ka National Games ha u snem 2027, u Myntri ka sorkar pdeng u la kyntu ïa ki nongshong shnong ban pynkhlaiñ ïa ka kolshor ñiah cycle ha ka Jylla.
U la kyntu ïa ki briew ban ïashim bynta ha ki kam ñiah cycle man la ka Sngi U Blei bad ban trei ban pynlong ïa ka jingñiah cycle kum ka bynta kaba kongsan jong ka jingim ha ka imlang sahlang ha kylleng ki distrik, ki block bad ki jaka sor.
U la pynpaw ruh ba ka Meghalaya kadei ban pyndonkam ïa ka National Games ka ban sa wan ban kyntiew ïa ka jingñiah cycle kum ka jingïalehkai ha kajuh ka por ban pynshlur ïa ka kum ka kam paidbah.
