Dei ban tohkit bniah shaei jah ka pisa Hima Mylliem, balei ki EC barim kim lap ïa kane, la donkam shisha ban pynkhuid ïa ka KHADC

Bun kiba sngewsih haba ka KHADC, ka weng ïa U Syiem ka Hima Mylliem bad ki don ruh kiba pynpaw ïa ka jingsngew liang ne ka jingsngew niam halor kane ka mat.
Ha ka jingshisha ka KHADC ruh kam bit satia ban shu thung bad shu weng ïa ki khlieh nongsynshar, namar ba ka pynhiardor ïa ka kam synshar khadar jong ki Hima Khasi, hynrei lada ïakren pat ba U Syiem Mylliem lane kiwei pat ki Hima, kim siew ïa ka khajna jongki, kaba la thoh shai ha ka sanat jongki, kumta ki dei hok ban shah weng lane ban shah tohkit, halor katei ka jingleh bym salia jongki, ïa la ka jong ka iktiar ba la aiti ha ki.
Na kaei kaba tip paidbah, ki Hima ki ju dei ban siew khajna sha ka KHADC, ha kaba ïadei bad ka jingïoh kamai jongki na ki Ïew ki hat, kaba ki dei ban siew 10 percent bad na ka jingïoh kamai pat na baroh, ki dei ban siew shi bynta na ka phra bynta jong ka jingïoh jongki bad ki don ki Hima, ki bym don kamai, kumta ki ju thoh sha ka KHADC, ba ka dei ban weng noh ïa kitei ki khajna, lane ba kan pynduna bad katei ka dei ka rukom, kaba la ïaid naduh ka jingsdang treikam jong ki District Council ha ka jylla.
Na ka jingkren jong U Chief Executive Member ka Khasi District Council, la ïathuh ba ka Hima Mylliem, kaba dei ka Hima kaba heh tam ha ka ri ki laiphew Syiem, hynrei kam shym la siew satia ïa katei ka khajna kaba ka ïoh lum na ki ïew bad kumjuh ïa ka shi bynta na ka phra bynta lane ka one eight share, kaba ki Hima ki dei ban siew man la u snem sha ka KHADC.
Lada ka long ha kane ka dur, ka mat ka kongsan bha ban tih kham jylliew bad kata ka long, ba balei U Syiem jong ka Hima Mylliem, um shym siew ïa katei ka khajna, kaba dei hok ha ki 8 snem ba la dep, kaba dei pynban ka jingpynkheiñ ïa ka kyndon ba la thoh ha ka aiñ ba thung ïa ki khlieh nong synshar da ka KHADC.
Kam kut tang katta, la lap ba U Syiem bad ki myntri jong ka Hima Mylliem, ki ju long ruh ki nongshna pisa jong ki MDC bad ki Executive Member jong ka KHADC, ha kaba ki knieh noh ïa ka jinglum khajna na ki ïew, khamtam na Ïewduh, ki ju tuklar ïa ka jingïoh lum kamai jong ki Hima bapher bad ki ju dawa pisa jubor bha na ka Hima Mylliem, ha ki por elekshon, ha ki por Christmas bad snem thymmai, ba kin ïoh lehkmen leh sngewbha.
Kumta ba kan shai lut phar, ka donkam ïa ka Executive Committee, ba mynta ba kan tih bniah ïa ka jing ïoh kamai jong ki Hima, khamtam ka Hima Mylliem, ha kine ki phra snem ba la dep, kiba dei ki snem ba kam siew ïa ka one eight share bad hangta kan sa mih lut plain ka jaboh jabaiñ bad kan bha shibun, lada ka District Council, kan thung da u nongbishar jong ka, ba un shimti ïa ka jingtohkit ban sei madan ïa baroh ka jyrsih kaba don ha katei ka Hima.
Nangta kaei kaba donkam mynta ka long ba KHADC kadei ban tohkit na ka Hima Mylliem shano katei ka pisa ka la pynïaid ha kitei ki snem bad balei ka khlem poi sha ka pla tyngka jong ka KHADC.
Bad lada ba kadei shisha ba katei ka pisa ka poi sha ki MDC ha kitei ki snem kadei ban pynshitom katkum ka aiñ ba la dawa beaiñ da ki MDC ïa ka khajna jong ka Hima Mylliem bad kiwei kiwei pat ki Hima bad lada lap lyngba ka jingtohkit dei ban thad pyrthei ïa ki kyrteng jong ki bad ki Seng saiñ pyrthei ba ki la mihkhmat khnang ba u paidbah un shai namar manla ka por la shu ïoh sngew ba ki MDC ki aidaw bym ju ïoh skhim ne MDC skhim.
Kala dei ka por ba kane ka Executive Committee ba mynta ban pynkhuid lut ïa baroh ki jyrsieh ba la sarang bha kiba la kynrei naduh ki snem ba mynshwa hapoh KHADC bad kiwei pat ki District Council.
Kane ka jingjia jong ka jinglap ka Executive Committee ba mynta ïa ka jingjah ka pisa Hima Mylliem kaba dei ban poi kum ka khajna sha ka KHADC la bun snem ka la pynlyngngoh ïa kiba bun balang ba kumno kane ka wanjia bad kumno ba ki EC barim kim leh eiei ïa kane ka jingbym pynpoi ka khajna jong ka Hima Mylliem sha KHADC.