Iap palat 100, mynsaw da ki spah ngut na ka jing thombor ka ISIS ha ka jaka pynlong Concert ha Russia

Moscow, Lber : Ka kynhun Islamic State (ISIS) ka la shim ïa ka jingkitkhlieh ha kaba ïadei bad ka kam thombor ba shyrkhei hapoh ka hall ba pynlong concert ha Moscow kaba la shim ïa ka jingim jong palat 115 ngut ki briew bad ka jingmynsaw ïa palat 150 ngut kiwei pat ha kane ka sngi Thohdieng ba la lah.
“Ki riewïaleh ka ISIS ki la thombor ha kane ka jaka ïalum paidbah ha ki thaiñ ba pajih na ka nongbah Moscow ka Russia,” ong kane ka kynhun kieng atiar lyngba ka Telegram.Ka la ong ruh ba kine ki nongthombor ki la wanphai biang sha la ki jong ki ktem hapdeng ka jingshngaiñ.”
Ki riewkieng atiar ki la synreit kuli pathar hapoh ka concert ïatem ïa put ha ka thaiñ shatei ka Moscow kaba la shim ïa ka jingim jong palat 115 ngut ki briew bad pynmynaw ia palat 150 ngut kiwei pat bad kaba la wanrah ruh ka jingpluh ding ba triem hapoh kane ka jaka pynlong concert, ong ka khubor sorkar.
Kine ki riewkieng atiar kiba phong da ki riam shipai ki la wan rung ha katei ka hall bad synreit kuli pathar bad kawang ruh da ki bom grenade bad kiwei pat ki jait bom, ong u nongpathai khubor uba don ha katei ka jaka.
Na ka liang ki bor sorkar ki la ïaid shakhmat ban pynlong ïa ka jingtohkit, bad na ka liang u President Vladimir Putin ruh ula shim khia halor kane ka jingjia, ong u nongaiktien jong u, u Dmitry Peskov lyngba ki lad pathai khubor.
Kane ka jingjia shah thombor ka la wan long ruh jan shi bnai hadien ba ka United States ka la maham ïa ki bor sorkar ka Russia ha kaba sdang jong une u bnai halor ka kam thombor lehnoh kaba lah ban wan jia ha ki jaka paidbah ha Moscow, ong ka White House khyndiat kynta hadien katei ka jingjia ba shyrkhei.
“Ha kaba sdang jong une u bnai ka sorkar US ka la ïoh jingtip halor ka jingthmu kam thombor jong ki lehnoh ha Moscow, kata kaba lah ban long ha ki jaka ïalum paidbah, bad halor kane ka Washington ka la ïasam lem ruh sha ki bor sorkar ka Russia,” ong ka nongaiktien ka National Security Council ka Adrienne Watson.
Ki heh sorkar US ki la pynpaw ruh lyngba ka lad pathai khubor ba ki ngeit ba ka jingkam jong ka ISIS halor kane ka jingjia ka dei kaba shisha.
Ki katto katne ki jingjia shah thombor ba shyrkhei ha kane ka nongbah ka Russia naduh ki 25 snem kiba la dep ki kynthup halor ka jingpynbthei bom ïa ki ïing bun mala kaba la jia ha ka step jong ka 13 tarik u Nailur 1999 ha ka thaiñ shathie mihngi ka Moscow kaba la shim ïa ka jingim jong ki 118 ngut ki briew.
Na ka liang ka Moscow ka la kynnoh ïa ka jingdonkti jong ki lehnoh na ki thaiñ ba bun ki paid Muslim ha ki bynta shatei ka Caucasus shatei jong ka Chechnya.
Kawei pat ka jingthombor ba shyrkhei ka la jia ha ka 23 tarik u Risaw 2002 hadien ba ki lehnoh Chechen kiba kynthup ïa 21 ngut ki shynrang bad 19 ngut ki kynthei ki la thombor ïa kawei ka jaka cinema ha Dubrovka ha Moscow bad bat koidi jubor ïa haduh palat 800 ngut ki briew.Ka jingïaleh pyrshah bad ki bor pahara ka la neh haduh ar sngi lai miet.
Kane ka la kut noh hadien ba ki bor shipai ki la siat da ka kynja lyer ba long bih hapoh katei ka hall ban pynjem khnap ïa ki lehnoh.Ha kane ka jingjia haduh 130 ngut ki briew ki la ïap ha kaba bun na ki, ki la khlad noh namar ka jingïoh ring ïa ka tdem ba long bih.