Shillong, Lber 23 : Ha kawei ka jingjia kaba la jia ha ka step Sngi Thohdieng, uwei u nongñiah trok na kane ka jylla Meghalaya uba dei na ka shnong Kyndongtuber, West Jaintia Hills u la shah rahbor bad shah pyniap dusmon ha ki riew runar ha ki thaiñ ka Jagi Road lynti ban leit Nagoan ha ka jaka ba la tip kum ka Kaliabor da kaba shah bom da u wheelrench na ki bynta ka khlieh bad hadien kane ki sa thep ïa ka metiap jongu ha poh ka seat dien jongka trok.
Une u nongñiah trok uba dang 46 snem ka rta u dei uba kyrteng u Nicolas Dhar. La ïathuh ba ha ka Sngi Palei u la leit kit ïa ka dewbilat na Topcem Cement ban leit pynhiar sha Upper Assam. Haba u la dep ban jam ïa ka toll gate ha Raha, Assam u la phone sha ka para ha ka por kumba 1 baje ei ei mynstep bad ong ïa ka ba u la samthiah kumta un thiah shwa bad u phah ïa ka para ban sa kyrsiew ïa u ha ka por 4 baje mynstep.
Ha ka por mynstep haba la phone ka para ruh ym don ba shim ïa ka phone, bad haba u trai jong ka trok kaba dei ka SPS Transport bad don u number NL-01AA 6213 u la peit lyngba ka GPS ïa ki trok jongu u la ïohi ba kane ka trok ka la ïaid sha ka lynti ba kam dei shuh ban ïaid. Kumta u la phone ïa u nongñiah bad la shim da uwei u briew uba dei u bar jylla bad u la ïathuh ha u trai ka trok ba u nongñiah kata u Nicolas u ïoh thiah um kyndit wat la kyrsiew ruh.
U trai uba la pyndait GPS ïa ki trok u la ipher ïa ka rukom ñiah sted ïaka trok namar wat haba la ong ba un pynsangeh ïa ka trok harud surok ruh um treh satia kumta u trai u la pyntip sha ki bor pulit kiba la ïoh bat ïa katei ka trok na Kaliabor bad kem ïa utei u briew uba ñiah ïa ka. Hadien kane haba ki pulit ki la tohkit shaphang u nongñiah jong ka trok utei u briew u la ïathuh ba um don hapoh ka trok namar u la hiar ha shiteng lynti. Ki pulit ki la mut ban rah ïa ka trok sha Thanad ban tohkit bniah hynrei haba kam start ki la plie ïa ka seat dien jong ka trok ba ju buh ïa u battery ban pyndait bha ïa u battery bad lap pynban ba la thep ïa ka met iap jong u Nicolas hapoh katei ka seat. Mar mar ki pulit ki la kem ïa utei u briew ban tohkit bniah ïa u bad la ïoh jingtip ba mynta ki pulit ki dang thwet ïa kiwei kiba ïadonkti lang ha kane ka jingjia. Ha ka jingtohkit utei uba la ïoh kem da ki pulit u la phla ba ka jingthmu ka long ban die ïa katei ka dewbilat baroh shitrok bad kumjuh ruh ïa katei ka trok.
Kiba haïing hynnin hi ka sngi ki la leit ban shimti ïa ka met hynrei namar ba hap ban pyndep ïa ka post mortem kumta ki dang ïoh ban wan kit mynta ka miet ïa ka met sha la shnong na ka bynta ban pyndep ïa kaba sah jong u.
