ïap 144 ngut, mynsaw 700 ngut, julor jur ka Myanmar ba khynñiuh u jumai 7.7 magnitude

Shillong, Lber 28 : U jumai uba jur bha bad ba kot 7.7 magnitude ula khynñiuh na Central Myanmar ha ka step sngi Thohdieng, uba la pynkhynñiuh ruh ha kylleng ki ri ba marjan kynthup ïa ka India, China, Thailand, Vietnam bad Bangladesh. Hadien une u jumai, ula khie biang sa uwei u jumai ba bud, uba kot haduh 6.4 magnitude. Ha kane ka jingjia palat 144 ngut ki briew ki la iap bad kumba 700 ngut kiba mynsaw jur. Ym tang katta ka jingshah pynjulor ki jingtei naduh ki ïing ki sem, ka jingkieng ka la jur palat pud.
Ka thymmei jong une u jumai ka dei na sor Sagaing, kaba jngai kumba 17 km na Mandalay, Myanmar. Kat kum ka jingong ka United States Geological Survey (USGS), une u jumai ula khynñiuh ha ka por 11:50 baje mynstep na ka jingjylliew ba 10 km.Ka jingkieng ba pawnam ha Mandalay-ka Ava Bridge ruh kala twa bad hap sha um.
Ka Sorkar shipai ha kane ka ri kala pynbna ïa ka emergency ha ki 6 tylli ki thaiñ : Sagaing, Mandalay, Bago, Magway, eastern Shan State, bad ka Nongbah, Naypyidaw. Ki kynhun ai jingïarap kila wad ïa ki briew ha kylleng ki jaka kiba shah ktah ha une u jumai. Ki bor Sorkar kila kyrpad ruh ïa ki Ri ka pyrthei ba kin ai lem ïa ki jingïarap.
Ha India, ïa ka jingkhynniuh u jumai la ïohsngew ruh haduh ha Delhi ka Nongbah jong ka Ri ha ka por 11:50 baje bad ïa ka jingkhynñiuh kaba rit la ïohsngew ruh ha Kolkata bad Imphal ha kaba ki paidbah kila hap ban ïamih shabar. Hynrei donbok ba ym shym la don kano kano ka jingjulor ne ka jingduh noh ki mynsiem briew.
U Myntri Rangbah duh ka Ri Narendra Modi ula pynpaw ïa ka jingsngewkhia halor ka jingpynjulor u jumai ha Myanmar bad Thailand bad ong ba ka Ri India ka long kaba la khreh ban ai ïa baroh ki jingïarap sha kine ki artylli ki Ri.
Haba thoh ha X, u Modi ula ong “Sngewkhia ïa ki jinglong jingman na ka jingkhynñiuh u jumai ha Myanmar bad Thailand. Nga duwai ïa ka jingshngaiñ bad ka bha ka miat jong baroh”.