Katba nangmih ki sngi, la i kumba ki jaka khamtam ha Motphran , Khyndailad ki la nang khap ngïah na ka jingbun briew ne ka jingroi jong ki nongshong shnong. Hooid ka dei kaba ym lait ban lait la ka long ha kano kano ka shnong ne kano kano ka ri ruh. Hynrei ka jingdon ïa ka aiñ kaba khlain bad ïa ki nongsynshar kiba ïohi jngai ka pynlong ïa ka nongbah ban long kaba ïaid beit ïaid ryntih. Katba hangne ha ka nongbah Shillong pat haba shu peit la i kum ka nongbah ne ka sor kam don satïa ki nongsynshar. Ki lynti paidbah bad ki jaka iew ki la jyllei da ki nongdie jingdie bad la shu ïa tur bad phrïang katba mon haduh ba la khapngïah lut ka lynti ka synkieng ruh da ki nongdie madan bad ki nongkhaii beain bad dkhar bad khasi. Naduh na Iewduh shaduh Khyndai lad bad wat kiwei ki dong ruh katei ka jingïatur bad khnieh wat ïa ki jaka ïaid paidbah ruh ka la jyllei bha ha kine ki sngi katba nangmih na uwei u snem sha uwei u u snem.
Ka Iewduh ka dei kawei ja ki jaka kaba khapngïah tam bad ka daw kam dei ei namar ba la bun ki briew nongleit siew, hynrei ka daw kaba kongsan ka dei namar ba ki bor kiba peit bad synshar ïa ka Iewduh kim lah ban teh lakam ïa ki paidbah nongkhaii ba ki dei ban dier ïa ki mar tang hapoh ki dukan ne ki basa kiba la ai sha ki. Hynrei wat ïa ki lynti ïaid ruh la phïah ha ki ar bynta bad la buh jaka die madan noh hapdeng. Ym tang katta, la mih sa ki nongdie dukan syndon hapdeng ka Surok. Kane ka la wanrah jingeh wat ïa ka Hima Mylliem kaba long ka nongpeit nongri bad nongsumar ïa ka Iewduh. Mynta ka ïakynduh mawsïang, shano yn bret ïa kine ki nongdie madan kiba shong die jingdie syndon hapdeng surok kaba la wanrah ïa ka jingud jingkhnium na ki paidbah bad na ki nongnïah kali. Hato ïano yn kynnoh ïa kane, namar kam dei eh ka jingisynei ïa kiba duk kiba toi hynrei kawei na ka daw hi ka dei ka jingkangar pisa jong ki bor kiba dei peit ïa ka jingïaid beit ïaid ryntih jong ka Iew. Hooid baroh ngi sngewsynei ïa kiba duk ba toi ba kin ïoh ban kamai jakpoh, hynrei ym lah pat ban ïapein ïa ka jingkylluid bad ka jingïaid beit ïaid ryntih jong ka rukom synshar khadar.
Ka Shillong kaba la ïoh ïa ka nam kum ka Scotland jong ka ri Mihngi na ka por sha ka por ka la nanglip rong lip rong katba nangmih ki sngi bad lah ban ong ba mynta lei lei ka la dei pynban kawei na ki jaka kaba lymmuh tam ha kine ki sngi ha ka lïang ka iew ka hat. Ha kine ki sngi ka la long kaba thait bha ban rung shapoh jong ka Iewduh namar ba la pynwit palat ïa ki lynti ïaid baroh da ki nongdie madan bad ka iew ka la shu khap ngïah bad kam long shuh ka iew kaba khuid kaba suba. Nalor jong ka jingpynwit jong ki nongdie madan ha ki lynti iew wat kito kiba don la ka jong ka basa ruh ki ïaleh katba lah ban phrïang ïa ki mar jong ki palat ïa u pud u sam jong ka dukan ne ka basa jong ki. Kane ka la nang pynkhap ngïah shuh shuh ïa ka iew kaba la bna nam jong ka ri Khasi.
Ki paidbah ki ju ud bha ban kiew sha Motphran bad Police Bazar ha ka sngi saitjain namar ba jur palat ka jingkhapngïah na ka jingïaphngïan shaba palat ka jingbunbriew kiba wan siew ban tda. Naduh surok, ka jingdheng kali kaba jur, nalor ka jingkhapngïah hapoh iew ka long shaba palat nalor ïa ki lynti ïaid kjat la shong die madan da ki paidbah. Watla ki bor ba dei peit jong ka Hima Mylliem, ki ïakynduh mawsïang ban pynkylluid ïa ka iew namar ka jingbym kohnguh jong ki paidbah kiba ju shim kabu ban die jingdie harud surok bad harud lynti ïaid kjat kaba pyndik haduh katta katta ïa ki nongleit nongwan.
Baroh ki lynti ïaid jong ka Iewduh kiba la kham heh kim lait shuh na kane ka jingtur jong ki nongdie madan bad ruh ki nongdie dukan ba phrïang ïa ki mar jong ki shabar la ka basa. Ka bor jong ka pisa shisha la la pynduh lut ïa baroh ki jingbit jingbïang jong ki paidbah bad ruh ka jingdon ïa ka Iew kaba khuid bad kaba itynnad jong kane ka ri Khasi.
Ym tang ka Iewduh hynrei wat ki rud surok jong ka surok naduh Motphran shaduh Khyndailad ki la kylla long ki jaka die madan. Ha kine ki sngi ka Motphran ka la long kawei na ki madan iew luri lura bad ym don ain shuh ka ban teh lakam ïa ka jingïaid beit ïaid ryntih. Baroh ki la ïatur beit ban die ïa la ki jong ki mar k ibapher bapher ha Motphran. Ki rud jong ka surok naduh rum Motphran ter ter sha Bimola, shaduh them bijoi ki dap da ki poi ei kiba la pynwit ïa ka surok bad pynthut ïa ka leit ka wan jong ki paidbah. bunsien ki paidbah ki hap ban ïaid lang bad ki kali ha surok namar ba ki sur surok bad lynti ïaid kjat la klun lut da ki khar die madan.
Ka jingailad na ka lïang jong ki bor ba dei peit ïa ka bha ka mïat jong ka sor ka la pynshlur shibun eh ai ki briew na ki thain nongkyndong ban wan buhai shnong shapoh sor bad im la ka im kyndoi jakpoh da ki kam khaii bad die madan. Hynrei kawei kaba i shyrkhei ka long ba kiba bun kiwei pat ki shim kabu bad katba katba nang bun ki briew kiba lyngkar ka imlang sahlang ka kylla long lyngkar bad shibun ki kam sniew ki lah ban jïa. Ka jingbymlah jong ki riew lyngkar ban roi ha ka kamai ka jih ka wanrah shibun ki jingïalam bakla ïa ka jingim jong ki hi.
Lehse ka Dorbar jong ka Hima Mylliem, ka la dei ban pyrkhat noh da kawei pat ka lynti ban pynkylluid ïa ka Iew da kaba wad ïa ki lad ki lynti jingïarap pisa khnang ban shna pynbna noh ïa ki Basa kiba don hapoh iew bad kiba don sawdong sawkun jong ka Iewduh khnang ba ka Iew ym tang ba kan wanrah ka jingkylluid hynrei kan wanrah ruh ïa ka jingkhuid jingsuba khnang ba kane ka Iew kaba ju lehnïam manla u snem bad pawnam naduh ka por u menbarim kan ïoh bïang ïa ka nam ba ka don.
