Jowai, Risaw 03: Ka Seng Samla Committee jong ka Kur Sookpoh Khadar Wyrnai Jowai bad ka Jingïaseng Samla Balang Presbyterian Jowai hynnin ka sngi 2 tarik kila leit ai snam sngewbha ha Jowai Blood Bank kaba don ha Panaliar, Jowai shibynta na ka sngi kynmaw burom ïa ka National Voluntary Blood Donation Day.
Ïa kane ka prokram la pynlong da ka Blood Centre Jowai Civil Hospital ha ryngkat ka jingïatreilang bad ka State Blood Transfusion Council & Meghalaya Aids Control Society.
Hashwa ban synñiang snam kala don ka jingïalang ba lyngkot ha kaba la ïoh ka jingkren na ka Dr. P. Shylla In-charge Jowai Blood Bank kaba la batai halor ka jingkordor jong ka snam, khamtam ha ka por ba ki nongpang ki donkam kyrkieh ïa ka snam bad da ka jingdon kum kane ka jaka kynshew snam kan ïarap shibun eh.
Shuh shuh kala batai shaphang ki lad kiba dei ban jurip bniah ïa uno uno ne kano kano kiba ai snam hashwa ban shim ïa ka snam la ka long kaba bit ne em.
Katba na ka liang u Daloi ka Jowai u Puramon Kynjing ula ong wat lada u briew u don kyrhai ka spah hynrei ka long kaba leh nohei lada ym don kiba synñiang jingïarap haka por ba donkam. Kumta u kyntu ïa kiwei ba kin wan shakhmat ban synñiang leh ïa ka snam sha ki jaka kynshew snam na ka bynta ban pynim ïa ki mynsiem ba kordor.
Ha kane ka prokram la ïadonlang naduh ki nongïalam na ka Balang Presbyterian Jowai bad naka Kur Sookpoh Khadar Wyrnai kiba la synñiang ïa ka snam ha ka jingdonlang Medical Superintendent ka Jowai Civil Hospital Dr. P Paswet.
