Pdiang burom ka Ri Bhoi ïa u samla Lionel Daryl Rymmei kum u rangap kol ba kynsai ka ri haka SAFF U-19 Championship

Nongpoh, Risaw 03: Ki kynhun bapher bapher ka Ri Bhoi naduh ka FKJGP, CoRP, Young Minds Association ryngkat ka Ri Bhoi District Sports Association mynta ka sngi kala pdiang bad pynkup burom ïa u samla Lionel Daryl Rymmei u ba la ioh nam kum u rang ap kol ba kynsai tam jong ka kynhun u-19 ka ri India haka lympung South Asian Football Federation U-19 Championship kaba la long dang shen ha Nepal hadien ba ka kynhun ïalehkai jong ka Ri India kala lah ban pynliem noh ïaka Pakistan da 3-0 kol haka jingïakhun phainal.
Kum ban shu kdew hangne u samla Lionel Daryl Rymmei u dei na Umroi Ri-Bhoi District, u la leit ban mihkhmat ïaka kynhun u-19 ka ri India kum u rang ap kol kaba long ka jingsarong kaba khraw ïaka ri bad ka jylla hi baroh kawei bad wanphai noh sha ka jylla mynta ka sngi ryngkat ka jingsynran lang jong u kpa bad ki bahaiing hasem baroh naduh Jorabat, Nongpoh, Umsning ter ter shaduh Umroi kaba dei ka shnong kaba u shong u sah.
Naka liang ki nongïalam jong ki kynhun bapher bapher haba kren ha katei ka sngi kila pynpaw ba katno ka long ka jingkmen ba ka Ri India ka ioh ïaka nam jop ha katei ka lympung ïalehkai phutbol jong ki ri South Asia bad khamtam naka ri India la leit ruh ban mihkhmat da u Samla Lionel Daryl Rymmei kum u rangap kol u ba la knieh ruh ïaka khusnam kum ka rangap ba kynsai tam napdeng ki ri bala shim bynta katei ka lympung bad kane hi ka pynpaw ba ki samla khasi jong ngi kim duna shuh haka kam ïalehkai kaba long ka nuksa kaba khraw ïaki samla donsap haka jylla ba kin nangkiew shaphrang haka kam ïalehkai.
Na ka liang u Bah MD Syiem kpa jong utei u samla uba la synran lang naduh ka ri Nepal ka jak aba pynlong ïa katei ka lympung lem bad kiwei de ki bahaing hasem bad ki paralok, haba kren ha Umsning, u la pynpaw ïa ka jingsngewkmen bad ai ka jingkhublei ba kyrpang ïa ki kynhun seng bapher bapher ban pynkup burom kyrpang ïa u khun u jong u, uba long ruh u khun jong ka Ri Bhoi halor ka nam ka burom kaba u la ioh lyngba ka jingtrei shitom bad minot thop ha ka sap ka phong kaba u don, kat haduh ba un ioh ïa ka nam Best Goal keeper jong ka lympung under 19 ba la pynlong da ka SAFF ha Nepal.
U la kyntu ruh ïa kiwei pat ki khun samla ba kim dei ban sngew sarong halor ka sap kaba ki don, hynrei ban nang ïai minot bad khamtam ban don ka jingsngewrit namar kam don jingmut ban pyndeng syntiew mynta bad jah noh ka kyrteng tang shiteng por.