Ïam briew ki paid Khasi-Pnar na Cachar ba pom lut ka Assam ïa ki dieng kwai

Shillong, Nailur 01: Ki paid Khasi Pnar kiba shong ha ki saw tylli ki Shnong ha Cachar Hills District ki la shah thombor ha ki bor jong ka tnad Forest ka Assam, da kaba ki la ai hukum ïa ki ban mih noh na kine ki jaka ba ki la im ban shong ban sah da ki spah snem bad im ha ka rep ka riang.
Katkum ka jingïathuh u Spokesperson jong ka KSU Barak, u Bah Wanbor Pdang, la ong, ha ka sngi Palei ki Pulit bad ki Ophisar ka tnad Forest jong ka Assam, ki la wan ot bad pynkhyllem ïa ki dieng kwai, ki tympew bad ki jingthung jingtep ryngkat bad ka Eviction Notice ba ki dei ban mih shisyndon na kine ki jaka kiba long ka pliang ja jong ki.
U Bah Wanbor, u la ïathuh ba ka daw ba ka Assam, ka la pom ïa ki dieng kwai, ki tympew bad kiwei kiwei pat ki jingthung jingtep kadei namarba ka thmu ban pynïaid ïa ka bording elektrik jong ka Power Grid, ban thung 13 tylli ki Tower ban pynïaid ïa ki sainar elektrik lyngba kine ki shnong. Kine ki lai tylli ki shnong ki dei kiba don ha ka lynti ban leit sha Halflong.
Shuh shuh u la ïathuh ba kane ka jingphah mih noh ïa ki Khasi ba don ha kane ka jaka ka dei ka sien kaba nyngkong, wat lada na ka por ka ju wan ban pyntieng ïa ki ba ka dei ka jaka jong ka tnad Forest.
U Bah Wanbor u la ïathuh ba ki Khai Pnar ki la shong la sah ha kine ki shnong naduh ka por jong ki Phareng bad ki la im ha ka rep ka riang.
U la ïathuh ruh ba ka don ka mukotduma ha kaba ïadei bad kane ka kam, tangba ka jingbishar ka dang ïaid. Hynrei u la pynpaw ka jingsngewkhia ba kane ka jingleh donbor ka Assam, kan buh ïa ki paid Khasi ha ka jingeh kaba khraw, namar ba kim don jaka shuh ban leit shawei, haba ki la im hangtei la bun pateng. “Shaei pat ngin leit, haba ngi la long shnong long thaw ha kane ka jaka da ki spah snem”, la ong u Bah Wanbor.
U la ïathuh ruh ba ki paidbah ki la shu peit khlem lah ban leh eiei haba ki briew ka tnad Forest ki la rah da ki kurat bad ki mashin otdieng ban pynkhyllem naphang ïa ki dieng kwai kiba ki paidbah ki la thung bad sumar shitom da ki bun bun snem.
“Ki paidbah ki la sumar shitom da ki bun snem, hynrei tang ha ka shi khyllipmat ka Assam ka wan pynkhyllem ïa ki,” u la ong.
U la iathuh ruh ba ki paidbah kiba shah ktah ha kane ka jingleh ka Assam kim donlad da kumwei pat lait satang ban leit ud leit nam ha ki bor Sorkar Assam ban sngewsynei lem ïa ki.