Ha kine ki khyndiat sngi la ïohi ba ki samla pule ki la ai ka jingkyrshan kaba borbah ïa ka jingïakhih shah thngan ba la khot da u Bah Ardent Miller Basaïawmoit ban ïa khun na ka bynta ban pynbeit thymmai ïa ka Reservation Policy lane ka bhah thungkam thungjam. Kane ka jingleit ai jingkyrshan jong ki kadei namar ki kwah ban ïohi ba ka lawei jong ki ban ïoh kam sorkar kan dei kaba phyrnai.
Ha kawei ka liang, lada kren ïa ka jingshisha watla kam dei kaba pynduh mynsiem hynrei kadei pat ka jingshisha ba ha kane ka juk mynta ban ïa khun ïa kawei ka kam sorkar kaba thylli da ki hajar ngut ki paidbah kiba wan ban ïakhun bad teng teng da ki phew hajar. Kumta lada na bynta 10 tylli ki kam ba lait kiba aplai ki poi 10,000 ngut, kaba mut 9,990 ngut kin duh ïa katei ka kam. Haba kumta shaei kin leit, hato kin shu bunkam tang ban aplai kam sorkar lane ki hap ban pyrkhat ïa kiwei pat ki lad ki lynti lane ki lad kamai kajih.Kumta ha kane kum kane ka juk, ka sorkar ka la dei ban plie lad noh da kiwei pat ki jait kam kum ha kaba kyrshan ïa ki ban seng ïa ki kam lajong la ka long ki karkhana rit, nangta ban pynshlur ïa ki wat ban sdang noh da ki kam la jong la ka long ha ka rep ka riang, ka ri jingri bad wat ha kiwei ki kam. Mynta kat sha ba leit la ïoh sngew ba ka sorkar ka pynshlur ban kyntiew kam jngohkai haoid na bynta kito kiba sah ha kito ki jaka ba don jaka jngohkai ka ïahap eh hynrei na bynta kiwei pat ki bym don kaei pat ka lynti.
La ïohi ruh mynta ba bun ki samla bym pat ïohkam ïohjam kim nud shuh wat ban ktah mohkhiew lane ka wait, kane kadei ka jingma kaba khraw bad kaba buh ha ka jingsyier ïa ka pateng kaban wan. Dei ban sngewthuh ba ha nongkyndong ki heh ki san ki nang ki stad na kaba trei borbah ki kmie ki kpa ha u mohkhiew ym da kawei pat, hynrei lada ma ki pat ki isih lane kim nud ktah shuh kan buh ha ka jingma kaba khraw. Ïa kum kine ki jingjia ruh ka sorkar ka la dei ban wanrah da kawei pat ka lynti lane da ki kor ki bor ban rep ban riang lane ri jingri. Lehse ki samla ba la nang la stad kin ym ong shuh leit bat mohkhiew hynrei kin ong ba ki bat mashin ban rep ban riang. Ym lah ban len ha kine ki sngi bun na ki samla pule ha ka jylla ki hap ban mad ïaka jingjynjar jong ka jingkyrduhkam kyrduhjam bad bun ruh na ki samla kiba la pyndep ïa ki kyndan bapher bapher ha ki kyndan pule bapher bapher ki hap ban shong khlem kam khlem jam. Wat ki samla kiba la nang la stad ki la hap ban shu shong khlem kam namar ka jinghiran ka ïohkam ïohjam. Katba nang mih ki snem ka jingjyllei ki samla kiba la nang la stad ka la nangjur. Ka jinghiran ka ïohkam ïohjam ha kane ka Jylla ka long ruh namar ba ka Jylla kaba rit ka bym don satia ïa ki karkhana ai kam kumba long sha kiwei kiwei ki jylla ha kaba ki samla wadkam ki kham ïabeh ban trei ha ki Kompani namar ka jingsiew kaba heh watla ki hap ban trei shitom.
Lah ban ong, da ki hajar ngut ki samla na kane ka jylla kiba la hap ban jngai na la ïing tang namar ban leit wad jakpoh sha kiwei pat ki jylla namar ka jinghiran ka ïohkam ïohjam ha kane ka jylla. Ka jingkylli ka mih hangne, hato ka sorkar jylla ka lah ban ban aikam aijam ïa baroh ki samla kiba la pyndep ïa ki kyrdan pule kiba kham shalor. Lah ban ong ka long kaba eh ba ka sorkar kan lah ban ai kam ai jam namar ba ka jingroi jong ka jingbun paid ka la nangkiew katba nang mih ki sngi bad ki por. Ynnai ïa kren lei lei ïa ka lawei jong ki khynnah pule kiba dang don ha ki skul ha kaba peit shi synpeit la iduh jingkyrmen, namar khamtam kum ha ka Nongbah Shillong bad wat ha ki jaka nongkyndong ruh ha kine ki sngi tang kawei ka skul pule ka la don da ki hajar ngut ki khynnah pule.
Ban ïakren lei lei ïa ki samla kiba la pyndep tang ïa ka degree ruh da ki phew hajar ngut ki dang don kiba shong khlem kam khlem jam ha kaba ka sorkar kam lah satia ban ai kam ai jam. Lah ruh ban ong ba ka long shisha kaba shem jingeh ba baroh ki samla pule kin ïoh ïa ki kam sorkar kiba ha kine ki sngi tang ïa kawei ne ar tylli ki post ki nongthepkam ki la kot da ki hajar ngut. Ka long pat kaba sngewsih ban ïoh sngew ne tip ba ka jylla jongngi ka dang duna ïa shibun ki samla kiba la pyndep ha kiwei pat ki kyrdan ha kaba dang don ki kam ba ki briew na ka jylla kim pat lah ban trei ha kaba la hap ban wan na ki briew kiba shabar ka jylla kaba buh ïa ka jingduh jingkyrmen ïa ki khun samla ka jylla.
Bun ruh na ki samla ki dang lehraiñ ruh ban trei ïa ki kam kiba kham poh namar ba ki don ka jingsngew ba ka kyrdan kaba ki pule kam ïahap shuh ïa ki kam barit baria. Hynrei bunsien pat ki samla kim juh phohsniew da kaba trei ïa ki kamrit kam ria ruh ka long kawei na ki lad ban aikam ïa ki samla ba kin lah ban ieng hala ki jong ki kjat. Ka jingkylli ka mih ruh hangne, balei ba ka jylla jongngi ka jyllei da ki mynder ha baroh ki bynta jong ka nongbah Shillong ne wat sha ki jaka nongkongdong, ka daw kaba kongsan ba bunsien ngi ki kum ki samla ngi don ka jinglehrain ban trei ïa ki kam rit kam ria. Bunsien pat lada jyllei ki bar jylla ngi ïa ud bad ngi ïa kynshi kyneh ba ka sorkar kam shim khia ban ïada ïa ki mynder.
