Shillong, Jylliew 01: Ka Selsella Sports Association ka la bteng ka jingïaid lynti jong ka ha ka Meghalaya State League 2023 da kaba khlem shah rem ha kaba ka la khur jingjop biang da kaba pynliem kput da 8-3 kol pyrshah ïa ka Atong Matgrik ha ka Group D ha ka jingïalehkai hynne ka sngi Palei ha madan Chandmari Ground ha Tura.
Baroh lai tylli ki group ba la sakhi ka jingmih madan ha ka sngi Palei, ki dei ki jingïakhun kiba khatduh jong ki (final round), hynrei kam don kano kano ka jingshah knieh kyrdan ba nyngkong na baroh lai tylli ki jingïalehkai.
Ha kawei ka jingïalehkai, ka Mulait United ka la ïoh ban pynhiar mynsiem na ka samoi ïalehkai MSL mynta u 2023 da kaba pynliem da 6-1 ïa ka Rymbai Iawpynsing na ka Group B, katba na ka Group A ka Umkseh ka la ïakhun tyngeh hadien ba ka la shah thep kol ha kaba kut ka kylla step bad lah ban pynïakhaid da 2-2 pyrshah ïa ka Umrit.
Da ka jingjop ba mynta ka sngi, ka Selsella ka la kiew biang sha ka kyrdan kaba ar na ka Group D, kaba dei ka sien kaba ar ha kane ka tournament ha ryngkat ki lai tylli ki jingïakhaid. U Saldih Momin marwei u la ïoh ban thep ïa ka hat-trick ha ka minit ïalehkai ba 31, 33 bad 45+2) bad ïarap ai thep shi kol ïa u Walseng Sangma ha ka jingïoh thep kol kaba nyngkong eh ha ka jingïalehkai kaba dang ïaid 4 minit. Ïa ki saw tylli kiwei pat la ïoh ban thep da u Ramseng Sangma (22min), Tengsu Sangma (82min) bad u Sillingston Sangma u rangïalehkai ba mih madan kum u substitute u ïoh ban thep ar kol (85, 90min).
Ka Atong Matgrik ka la ïoh ban pynphai ïa ki lai kol lyngba u Walsrang Ch Sangma (35, 80min) bad na u Silash G Momin (48min), ha kaba u Silash G Momin u la ïoh ban thep kol hadien lai minit ba u la mih madan kum u substitute.
Ha ka jingïalehkai ha madan Kiang Nangbah Stadium ha Jowai, u Jas Chyrmang u la ïoh ban khyrwit ïa ka hat-trick ha ka minit ba 19, 49 bad 66, katba u Romarius Laban (63, 64) bad u Lency Swer (31) ki la ïo ban ïarap thep kol na ka bynta ka Mulait, kaba la kiew biang sha ka kyrdan kaba ar da kaba knieh na ka Ladthadlaboh da 12 point katba ka Ladthalaoh ka kamai 10 point. Ïa ka shi kol na ka bynta ka Rymbai la ïoh ban thep da u rangïalehkai ba mih substitute u Rimitre Lyngdoh ha ka minit ïalehkai kaba la ïaid 55 minit.
Ha Shillong, u Daraplang Thangkhiew u la thep ïa ka shi kol ha ka miit ba 34 na ka bynta ka Umrit shuwa ba ka Umkseh ka ïoh ban pynïakhaid lyngba u Rilangstar Umdor (60min).
Ka Umrit ka la ïoh ban lamkhmat lyngba ka kol ba la thep da u Modesterson Matlai (80min). Hynrei ka Umkseh ka la ïoh ban pynïakhaid lyngba ka kol ba la thep da u Rangkitbok Rani. Baroh ar tylli ki team ki la pyndep ha ka MSL da kaba khur mar 5 point, ka Umkseh ha ka kyrdan kaba lai bad ka Umrit ha ka kyrdan ba saw na ka jingïapher thep kol (-5 la -13).
