3 tylli ki takma khur ka samla Airikmenlang Shabong na ka jingïakob ïakhun kti ha J&K

Shillong, Jylliew 01 : Ka Samla Airikmenlang Shabong kawei na ki thei ïalehkai ïakhun kti kaba la leit ban mihkhmat ïa ka Jylla ha ryngkat kiwei pat ki nongïalehkai, ka la ïoh ban khur haduh 3 tylli ki takma na ka 45th National Arm Wrestling Championship kaba la long ha Jammu and Kashmir.
Na katei ka lympung ka samla Airikmenlang Shabong ka la ïoh ban khur ïa ki lai tylli ki takma ba kynthup ar tylli ki takma Rupa na ka jingïakob ïakhun kti kamon bad kadiang (left bad right hand) ha ka kyrdan ba 50kg jong ki youth bad ïa ka takma Rnong ha ka jingïakob ïakhun kti kamon ha ka kyrdan jong ki senior.
Lyngba katei ka jingïoh ban khur ïa kitei ki lai tylli ki takma, ka samla Airikmenlang kaba dei ka khun jong ka Kong Serita Shabong ba shong ba sah ha Madanbitaw kaba hap ha Sohïong, EKHD, ka la shah jied ban leit mihkhmat ïa ka ri India ha ka World Championship ka ban sa long ha Kazakhstan ha u Risaw mynta u snem.
Ïa katei ka rysan ïakob ïakhun kti kaba la pynïaid da ka J&K Arm Wrestling Association ha ryngkat ka jingïatreilang bad ka Sports Council kaba la sdang ha ka 22 tarik la ïoh ban pynkut noh ha ka 2 tarik Jymmang 2023 ha Sher-0-Kashmit Indoor Stadium, Srinagar.
Ha katei ka lympung ki don kumba 600 ngut ki nongïalehkai kiba la ïashim bynta na kylleng ki jylla bad union territory