Pdiang ka Komiti ïa ka jingtyrwa ka VPP ba thung da ka Expert Committee ban pynbha ïa ka RP
Shillong, Jymmang 31: Hadien ba ki lai ngut ki nongïalam jong ka VPP kiba la leit ïashim bynta ha ka All Party Meeting kila wan ïathuh ïa ka jingmih na ka jingïalang, u Bah Ardent Miller Basaïawmoit, President ka VPP u Bah Ardent Miller Basaïawmoit um pat hun da kaba ong, “Katba ngim pat ïoh da ka jingthoh ba ka Sorkar ka la thung da ka Expert Committee ban peit pynthymmai ïa ka Reservation Policy, ngam nym lait phai ïing satia”, la ong u Bah Ardent hapdeng ka jingrisa ki paidah.
U la ong ba naduh ka sngi ba u sdang ban shah thngan bad pdiang ruh ïa ka jingpynbeit ka Party ba un shah thngan, u la ong ba katba ka sorkar kam pat mynjur ban review ïa ka Reservation Policy un nym weng ïa kane ka jingshah thngan. “Kan shong ha ka sorkar, lada ka kwah ba ngan weng noh ïa kane ka jingshah thngan, kadei ban pynpoi kloi ïa ka jingthoh sha ngi ka Party”, u la ong.
Ha shuwa jong kane, ki lai ngut ki nongïalam ka VPP kiba la leit ïashim bynta ha ka All Party Meeting ki long u Dr. Ricky Syngkon, General Secretary ka Seng, Dr. Batskhem Myrboh,Nongaiktien ka Seng bad u Bah Brightstar Marbañiang, MLA ka Mawlai, ki phong da ka sopti lieh ban leit ïashim bynta ha kane ka jingïalang.
Ka jingïalang hapoh ka jingpynïaid ka Ampareen Lyngdoh, ka la shim por haduh saw kynta badu Dr. Ricky Syngkon, u la ïathuh ba ka daw ka jingslem jong ka jingïalang, dei namar bun ki kren kyllaiñ. Katba na ka liang jong ka VPP pat ka kren shai beit ba dei ban pynbha ïa ka Reservation Policy bad thung da ka Expert Committee.
U Dr. Ricky, u la ai khublei ruh ïa ki paidbah ka ri kiba la wan ai jingkyrshan ïa u Bah Ardent naduh ba u shong shah thngan naduh ka 23 tarik mynta u bnai.
Na ka liang u Bah Ardent haba ai jingkren sha ki paidbah, u la ong ba ka jingïakhun ïa ki mat jong ka jaidbynriew da ka jingïatylli lang kam pat kut, namar ki dang bun kiwei pat ki ki mat kiba ki paidbah kin hap ban ïeng tylli lang kawei kum ka jingïaleh pyrshah ïa ka jingbamsap bad kiwei kiwei de ki mat. Kaba kham kongsan eh ka long ka jingïatylli ka jaidbynriew, ïa kaba ym dei da lei lei shuh ba shah ïalam bakla.
Ha shuwa ban leit ïashim bynta sha ka jingïalang, u Bah Adelbert Nongrum, MLA ka North Shillong, u la ïalam ïa ka jingïaduwai lang ryngkat ki hajar ngut ki paidbah kiba la ap kmang naduh ka por 1 baje mynsngi tad haduh ban da wai ka jingïalang ha ka por 6 baje janmiet.